Timur Hakimov: "Jizzaxlik ishqibozlarni O'zbekistondagi eng yaxshi muxlislar deb bemalol aytolaman"

Ushbu o'yin oldidan “Sug'diyona ” jamoasi xujumchisi Timur Hakimov saytimiz uchun intervyu berdi.

- Timur, avvalambor “Sug'diyona” yoshlari jamoasi safida gol urganingiz bilan tabriklayman.

- Rahmat. Aslida biz bugun g'alaba qozonishimiz kerak edi, ammo oxirgi daqiqalarda g'alabani boy berdik. “Sug'diyona” o'rinbosarlari tarkibida gol urdim. Lekin men asosiy jamoa safida gol urishni maqsad qilganman.

-  Sizni “Sug'diyona ” jamoasiga kelishingizni eshitib, Jizzaxdagi futbol muxlislari sizni  ko'tarinki kayfiyatda qarshi olishdi. Jizzax muxlislari haqida nima deya olasiz?

- Jizzaxda futbolni yaxshi ko'rishlarini uydagi dastlabki o'yindayoq anglagandim. Meni juda iliq kutib olishdi. Jizzaxlik ishqibozlarni O'zbekistondagi eng yaxshi muxlislar deb  bemalol ayta olaman. Uydan uzoq bulishimga qaramay meni har uchrashuvda qo'llab-quvvatlashishi albatta bu yoqimli. Men ham ularning ishonchini oqlayman.

- “So'g'diyona” xaqida nima deya olasiz?

- Bilasiz, men bundan oldin 1-liga jamoasi safida o'ynaganman. Oliy ligadagi faoliyatimni esa “Sug'diyona”da davom ettiryapman. "So'g'diyona"dagi barcha meni juda iliq kutib olishdi va jamoadoshlarim, murabbiylarimning hammasi bilan juda yaxshi munosobatdaman.  Buning uchun ulardan minnatdorman.

- Malumki, “Sug'diyona ” jamoasi o'z uyida “Olmaliq” klubini qabul qiladi. Bo'lajak o'yin xususida fikrlaringiz bilan o'rtoqlashsangiz?

- Ertaga juda qiziqarli o'yin bo'ladi deb o'ylayman. Oson o'yin bo'lmaydi va biz har uchrashuvga alohida tayyorgarlik qilamiz. "Olmaliq"ga qarshi bahsga bir hafta davomida jiddiy tayyorgarlik ko'rdik. Jamoamiz ruhan va jismonan bellashuvga tayyor. Albatta chiroyli futbol ko'rsatib, bizga muhim bo'lgan 3 ochkoni qo'lga kiritamiz degan umiddaman.  

- 2016 yilda Timur Hakimov o'z oldiga qanday maqsadlarni qo'ygan.

- Avvalo o'z jamoamga foydam tegishini istayman. Oliy ligada o'z o'rnimga ega bo'lish va uyin mahoratimni oshirib borishga intilaman.

Intervyu davomida Timur juda samimiy inson ekanligini yuzidagi tabassumidan anglasa bo'lar edi. U "Manchester Yunayted" va futbol yulduzi Ronaldinoga muxlislik qilishini ham aytib o'tdi. Ushbu samimiy futbolchimizga kelgusi ishlarida omadlar va zafarlar tilab qolamiz.

Dildora Xolboeva suhbatlashdi.