Temur Kapadze: "Biz uchun g'alaba juda kerak edi"

- O'yin qanchalik qiyin kechdi?
- Birinchi uchrashuv hech qaysi jamoa uchun oson kechmasligi aniq edi. Bugun ham shunday bo'ldi. Birinchi bo'lim biroz qiyinroq bo'ldi, ammo tanaffusdan keyin o'zimizni ko'rsata oldik. Biz uchun bu bellashuvda chiroyli o'yindan ko'ra, g'alaba qozonish muhimroq edi.

- Raqib qaysi tomonlama qiyinchilik ko'rsatdi?
- Biz koreyaliklarni ikkinchi raqamli jamoa sifatida harakat qilishini bilardik. Va shunga yarasha tayyorgarlik ko'rgandik. Raqib asosan "ikkinchi qavat"da ustunlik qilishga harakat qildi. Biz gol urib olgach, KXDR asabiylasha boshladi, agar ikkinchi to'pni ham kiritganimizda, ular umuman o'yin tizginini qo'ldan chiqarib yuborgan bo'lishardi.

- Bir vaziyatda bosh bilan gol urishingiz mumkin edi.
- O'sha vaziyatda koreyaliklarni shunchaki omad goldan qutqarib qoldi deb o'ylayman. Agar to'p darvoza ustuniga tegmasdan gol bo'lganida, biz uchun o'yinning qolgan qismi yanada oson kechardi.

- Hakam tomonidan qo'shib berilgan oxirgi daqiqada gol o'tkazib yuborishimiz mumkin edi.
- O'sha vaziyatda o'zimizni biroz bo'sh qo'yib yubordik. Albatta, bahs oxirlarida hamma toliqqan, qolaversa, o'yin paytidagi kuchli yomg'ir - bularni ham inobatga olish lozim. Yaxshiyam o'sha vaziyatda Ignatiy Nesterov to'pni qaytarib yubordi, agar gol o'tkazib yuborganimizda judayam alamli bo'lardi.