"Surxon" nazorat uchrashuvida durang qayd etdi

Igor SHkvirin boshqaruvidagi "Surxon" jamoasi CHimyon tog'larida yig'inni yakunlab, ikki kunlik dam olishdan so'ng Toshkent shahrida navbatdagi yig'inni boshlab yubordi. Termizliklar kecha "Geofizika" qarorgohida yozgi o'quv-yig'inidagi ilk nazorat o'yinini o'tkazdi. Ularning sparring-raqibi "Xorazm" jamoasi bo'ldi. Urganchliklarning ustunligi ostida o'tgan bahsda durang qayd etildi. SHuni aytish lozimki, davralar oralig'ida "Surxon" tarkibni deyarli yangitdan tashkil etayotganligi uchun ham jamoaviy o'yinini yaxshi shakllanib ulgurmaganini ko'rish mumkin. 

"Xorazm"ga qarshi kechgan bahsda SHkvirin har bir taymda yangi yangi tarkibni sinovdan o'tkazdi. Xususan birinchi bo'limda "Surxon"ning tarkibi quyidagicha ko'rinishda bo'ldi: Ruslan Matniyozov, Najmiddin Normurodov, Ubaydullo Xoliqulov, Nizomjon Norov, Abbosbek Po'latov, Otabek Ahmadjonov, Alisher Mirzaev, Timur Usmonov, Sirojiddin Allaev (Ibrohim Abdullaev), SHerdor To'xtasinov, Ravshan Xursanov. 

Ikkinchi taymda tarkib butunlay yangilandi: Azamat Ahmedov, Azizbek Usmonov, Qahramon Mahamadjonov, Ibrohim Abdullaev, G'ayrat Jumaev, Daniel Nasriddinov, Javohir Aliqo'ziev, Abbos Maxstaliev, Sardor Eminov, Saidjamol Davlatjonov, Abdulaziz Yusupov. 

Uchrashuv tomoshabop ruh ostida kechdi. Ayniqsa birinchi bo'limning o'zida har ikki jamoa 2tadan to'p kiritgani, urashuvga yanada joziba bag'ishladi. Etiborlisi "Xorazm"dan 2ta golni ham Temur Ismoilov kiritgan bo'lsa, "Surxon"dan Temur Usmonov dublga erishdi. Ikkinchi taymda boshqa gol kuzatilmadi. 

SHuni ham aytib o'tish lozimki, termizliklarning tajribali hujumchisi Bahriddin Vahobov va yosh futbolchi Bek Abdullaevda kichik jaroxat borligi sababli mazkur uchrashuvda maydonga tusha olishmadi.