Superliganing 10ta va PRO liganing 4ta klubi qarzdorlikdan qutulmaguncha yangi shartnomalarni ro'yxatdan o'tkaza olmaydi

PFL bilan hamkorlik qilayotgan O'zbekiston futbolchilar uyushmasi "Andijon", "Buxoro", "Neftchi", "Bunyodkor", "Navbahor" va "SHo'rtan" klublarining futbolchilar oldida o'z vaqtida bajarilmagan majburiyatlari yuzasidan malumot taqdim etgan. Mazkur qarzdorliklar bartaraf etilmagunga qadar, yuqorida nomlari keltirilgan klublar ham yangi shartnomalarni ro'yxatdan o'tkaza olmaydi. Bu haqda championat.asia sayti ishonchli manbalarga tayanib xabar berdi.

Bundan tashqari, "Andijon", "Neftchi", "Nasaf", "Buxoro", "Qizilqum", "Mashal", "Metallurg", "So'g'diyona", "Navbahor", "Bunyodkor", "Surxon", "Qo'qon-1912" va "Oq-tepa" futbol klublari legioner futbolchilarni ro'yxatdan o'tkazganlik uchun Musobaqalar o'tkazish reglamentida belgilangan to'lovni o'z vaqtida to'lab bermagan. SHundan kelib chiqib, mazkur klublar ham transfer oynasida yangi shartnomalarni ro'yxatdan o'tkaza olmaydi.

"Mashal", "Metallurg", "So'g'diyona", "Navbahor", "Surxon", "Neftchi", "Zomin", "Xorazm", "SHo'rtan", "Istiqlol", "Oq-tepa" klublarining qatnashchilik badali bo'yicha qisman qarzdorliklari mavjud. "Nasaf", "Buxoro" va "Bunyodkor" futbol klublari esa qatnashchilik badalini umuman to'lamagan. Futbolchilarni ro'yxatdan o'tkazish jarayonida bu holat inobatga olinadi.

PFL futbol klublarining qatnashchilik badali bo'yicha to'lovlarni bosqichma-bosqich qisqartirish va sekin asta bu tizimni butkul yo'qotishni maqsad qilgan. Yuqorida nomlari keltirilgan futbol klublari mavsum avvalida sanab o'tilgan to'lovlarni to'liq to'lab berish majburiyatini olgan. PFL pandemiya sharoitidagi qiyinchiliklardan kelib chiqib, barcha futbol klublariga oson bo'lmagan mavsumni yakunlab olish imkonini berdi.