Srechko Katanec: "Kelgusi o'yinda butkul boshqacha tarkib maydonga tushadi"

"O'zimiz qilishimiz kerak bo'lgan ishni amalga oshirdik. Barchani g'alaba bilan tabriklayman. Maldiv orollari murabbiyini ham tabriklayman. Ular himoyaga yotib olmasdan, ochiq o'yin taklif etgan holda yaxshi o'yin namoyish etdi. Ular kelgusida o'sadigan jamoa hisoblanadi", – dedi termamiz ustozi.

"Bugun muhim uch ochkoga erishdik. Birinchi bahsga qaraganda ikkinchisida yaxshiroq o'ynadik. Oldinda bizni uchinchi to'qnashuv kutib turibdi. Maldiv orollari ochiq o'yin ko'rsatdi. Ularga bo'lgan hurmatim yuqori. O'n bir o'yinchi orqada bo'lgan jamoaga gol urish qiyin. Ilk o'yinda shunga o'xshash ko'pgina vaziyatlardan foydalana olmadik", – dedi terma jamoamiz sardori Eldor SHomurodov.

- Ikki o'yinda bir xil boshlang'ich tarkibni ko'rdik. Kelasi o'yinda ham shu 11 nafar futbolchini kutamizmi?   

- Yo'q, kelgusi o'yinda butkul boshqacha tarkib maydonga tushadi.

- SHomurodovga savol: Bugun gollaringiz soni bo'yicha Qosimov va Geynrix bilan tenglashib oldingiz. Taassurotlar qanday?

- Albatta, bundan xursandman. Tarix yaratish har bir futbolchi uchun orzu. Rekordni yangilash uchun esa vaqtim etarli. 

- Katanecga savol: Osiyo Kubogida g'alaba qozonish imkoniyatini qanday baholaysiz?

- Jamoamiz etarlicha sifatga ega, shuningdek, har bir jamoa singari muammolarimiz etarli. Sizlar buni mendan yaxshiroq bilasiz. Ushbu bosqichda ilk bor qatnashyapmiz. Har doim oxirgi bosqichda ishtirok etganmiz. Lekin o'z ustimizda ancha ishlashimiz kerak. 

Ko'pgina o'yinchilar turli klublardan etib keladi. Ularning holatiga ham qarashimiz kerak. Maldiv orollari bir oydan buyon yig'in qilmoqda. Menda bunday imkoniyat bo'lmadi. Masalan, Eldor kabi futbolchi murabbiy uchun har hafta 90 daqiqa o'ynasa, juda yaxshi. U "Roma"da ko'p o'yin o'tkazishga loyiq. Bugungi kunda jismoniy tayyorgarlik muhim ahamiyatga ega, usiz g'alaba qozonolmaymiz. 

- Masharipovning bugungi o'yini haqida fikringiz?

- Men hech qachon alohida o'yinchi haqida gapirmayman, uning o'zi bilan gaplashib olaman. Men jamoa haqida o'ylashim kerak. Birinchi taymdan mamnun bo'lmadim, ikkinchi taymni yaxshi o'tkazdik. Raqib jamoa charchagach, rejadagi o'yinimizni ko'rsata oldik.

- O'runovni maydonga tushirish rejangizda bormidi yo qandaydir omil sabab bo'ldimi?

- Vazitdan kelib chiqqan holda Ostonni o'yinga qo'shishga qaror qildim. Futbolchilarning mashg'ulotdagi tayyorgarligidan kelib chiqib madonga tushiraman. Kimdir mashg'ulotda yaxshi harakat qilishi mumkin, biroq o'yinda o'zini ko'rsata olmasligi mumkin. Biz boshqacha sifatga ega futbolchilarga muhtojmiz.