SHuhrat Maqsudov: "Yigitlar iroda ko'rsatishdi"

Ushbu uchrashuvdan so'ng mezbon jamoa bosh murabbiyi SHuhrat Maqsudov fikrlarini bildirib o'tdi. 

"Avvalo O'zbekiston xalqini chin ko'ngildan navro'z bayrami bilan tabriklayman. Sog'lik va salomatlik tilayman. Bevosita o'yin haqida fikr bildiradigan bo'lsam, oson bo'lmagan g'alabaga erishdik. SHuningdek, ob-havoning noqulay kelishi ham biroz qiyinchilik tug'dirdi. Raqib jamoa safida, murabbiylar shtabida "Bunyodkor" klubida faoliyat olib borgan futbolchi va mutaxassislar bor edi. Bu esa ularning ikki hissa kuch bilan o'ynashini anglatardi. O'ylaymanki, futbolchilarimiz murabbiylar tomonidan berilgan ko'rsatmalarni yaxshi bajarishdi. Ularning shunday chiroyli o'yin ko'rsatgani uchun minnatdorchilik bildiraman. Ko'rdingiz, bir kishi kam bo'lib o'ynadik. Yigitlar iroda ko'rsata olishdi. 

Bugun tarkibdagi o'zgarishlarga to'xtalsak, rotatciyalar qilganimiz futbolchilarning bor kuchi bilan to'p tepmaganini bildirmaydi. Ularning qanday kuchga egaligini yaxshi bilamiz. 

Ibrohim Tomivaning "Metallurg" bilan o'yinda gol ura olmagani hammada bo'ladigan holat. To'g'ri, bugun qizil kartochka olib qiyin vaziyatda qoldirdi. Qizil kartochka olgan vaziyatda hakam yaqin turgan edi. Buni tahlil qilamiz", deydi SHuhrat Maqsudov.

Abdulaziz Iskandarov yozib oldi