Sergey Kovshov: "Ketma-ket g'alabalardan xotirjamlikka berilish kerak emas"

- Bugun g'alabaga loyiq o'yin namoyish etdik va yakunda uch ochkoni qo'lga kiritdik. “Neftchi”ga qarshi bahsda futbolchilarimiz ko'p kuch sarflab yuborishgani baribir sezildi. SHu bois ayniqsa, birinchi bo'limda o'yinimiz kutilgan darajada chiqmadi. Himoyada ham tushunarsiz xatolarga yo'l qo'ydik. Yaxshiki, ikkinchi taymda futbolchilar o'zlariga kela olishdi. Natijada kerakli golni urib g'alaba qozondik. Muhimi uch ochko qo'lga kiritildi.

- Boshqaruvni o'z qo'lingizga olganingizdan so'ng “Andijon”ning o'yini kuchaydi va kerakli ochkolarga erishmoqda. Bu nima bilan bog'liq deb o'ylaysiz?
- Men yoshlar bilan ko'p vaqt ishlaganman, bilasizmi, yoshlar va kattalar o'rtasida ruhiy jihat boshqa-boshqa bo'ladi. Eng asosiy gap hamjihatlikda. Hamma bir kishi uchun, bir kishi hamma uchun qabilida, bir yoqadan bosh chiqarib ish olib borilsa natija ham bo'ladi. Aynan hamjihatlik evaziga o'yinimizni yaxshilashga harakat qilyapmiz.

- Bugungi g'alabadan keyin “Andijon” oliy ligada qolish vazifasini bajardi deb hisoblaysizmi?
- Ketma-ket g'alabalardan xotirjamlikka berilish kerak emas deb o'ylayman. CHempionatda kurash qizib boryapti. Musobaqa jadvalining yuqorisida ham, patki qismida ham kurash keskinlashmoqda. Mavsum yakunlanishiga 3 tur qolgan bo'lsa-da, hali chempion nomi ham, oliy ligani tark etadigan jamoalar ham aniq emas. Garchi, 27 ochkoni qo'lga kiritgan bo'lsak ham hozircha hammasi malum emas. Ammo imkoniyatimizni ancha oshdi. O'ylaymanki, kurash oxirigacha bo'ladi.