Sergey Chigodaev - O'zbekiston U-16 terma jamoasining CAFA U-17 kubogidagi ilk o'yini haqida

- Birinchidan, barchani g'alaba bilan tabriklayman. Bizga muxlislik qilganlarga rahmat. O'yindan shuni aytishim mumkinki, yakuniy hisob qayd etilganiga qaramay, o'yin ancha og'ir kechdi - ayniqsa, birinchi bo'limda. Bolalar yosh, bu yoshda hayajonlanish yanada katta rol o'ynaydi. Ayniqsa, o'z muxlislari oldida. Bu jamoamiz uchun birinchi rasmiy turnir, yigitlar bunday darajadagi o'yinlarga endi ko'nikishmoqda. Ammo endi ishonchliroq o'ynashayotgani ko'rinib turibdi.

Ikkinchi bo'lim boshida bizda chetlatish yuz berdi. Ammo, undan keyin jamoa yanada yaxshiroq o'ynay boshladi. Bu biz uchun katta tajriba, bu o'yinni tahlil qilamiz. O'ylaymanki, bundan keyin faqat o'yin sifatida qo'shib boramiz.

- Sizningcha, jamoa nimaning hisobiga kamchilik bo'lib o'ynab, g'alaba qozona oldi? Chetlatish vaqtida hisob 1:0 edi, shundan so'ng jarima zarbasidan so'ng Qirg'iziston terma jamoasi hisobni tenglashtirdi. Demak, kamchilikda O'zbekiston terma jamoasi 35-40 daqiqada to'rtta to'p kiritgan.

- Bunaqasi futbolda bo'ladi. Aytish mumkinki, yigitlar o'zlarini yig'ib olishdi. Ular ancha yaxshi o'ynashni bilishadi va chetlatish ularni biroz "jonlantirdi." Shundan so'ng jamoa erkinroq o'ynadi va shu orqali g'alaba qozonishga muvaffaq bo'ldi.

- Chetlatishdan so'ng jamoaga qanday ko'rsatmalar berdingiz?

- Biroz qayta qurib olishga to'g'ri keldi, albatta. Bizda tayanch yarim himoyachisi chetlatildi, shuning uchun hujumkor yarim himoyachini biroz pastga tushirdik. Shundan so'ng boshqa tayanch yarim himoyachisini tushirdik va maydon markazini yangiladik. Bolalarni ruhlantirdik va bilganingizcha o'ynanglar dedik. Chetlatishdan keyin ham qo'lni siltash kerak emas, o'yinni davom ettirish kerak. Aksincha, diqqatni bir joyga to'plab o'ynash kerak, chunki o'n kishi bo'lib o'ynashga to'g'ri keladi.

- Qirg'iziston terma jamoasi haqida nima deysiz? Birinchi bo'limda raqib juda yaxshi pressing qildi, jamoangizga xotirjam hujum boshlashga imkon bermadi, sizni deyarli darvoza oldida "yopib qo'ydi".

- Qirg'iziston bilan avval ham o'ynaganmiz, bu Turkiyadagi yig'inda bo'lgan. Raqib qanday o'ynashini bilardik. O'shanda Qirg'iziston ham yaxshi bosim o'tkazgandi. Bunday jamoa bilan pas orqali chiqish juda qiyin. Ayniqsa, bu yoshda futbolchilarda hali biroz mahorat etishmaydi, qaerdadir xato qilishdan biroz qo'rqishadi. Uzun uzatmalardan foydalanishga to'g'ri keldi, "ortdan" variantlar qidirildi. Birinchi bo'limda bu yomon chiqmadi, gol urishimiz mumkin edi.

- Keyingi o'yinda Eronga qarshi maydonga tushasiz. Eronliklarning murabbiylar shtabi ushbu o'yinda ishtirok etib, sizlarni bevosita kuzatib bordi. Eron terma jamoasini qanday o'rganmoqchisiz?

- O'yinni xuddi shunday stadiondan tomosha qilishni rejalashtirganmiz. Keyin o'yin yozuvi tayyor bo'lgach, o'yinoldi tahlilini tayyorlaymiz. Eron terma jamoasining turnirdagi birinchi o'yinidan so'ng kuchli va zaif tomonlari va jamoa qanday o'ynashi tushunarli bo'ladi.

- Turnir boshlanishidan oldin asosiy vazifangiz jamoani bo'lajak turnirlarga tayyorlash, tarkibni saralash ekanini aytgan edingiz. Shu bilan birga, O'FA rahbariyati sizga har qanday holatda ham turnirda g'alaba qozonish vazifasini qo'ymagan. Ammo, Qirg'iziston terma jamoasi ustidan qozonilgan g'alabadan so'ng va Eron bilan o'yinda muvaffaqiyatli natija qayd etilsa, O'zbekiston terma jamoasi g'oliblikka davogarlik qilishi mumkin. Shaxsan siz o'z oldingizga murabbiy sifatida ushbu turnirda g'alaba qozonish vazifasini qo'yasizmi?

- Albatta, bizning vazifamiz - jamoani tayyorlash, kelasi yili U-17 Osiyo Kubogida o'ynaydigan tarkibni aniqlash. Turnir boshlanishidan oldin ham shu haqda gapirgan edim. Bundan tashqari, keyinchalik mamlakat bosh jamoasida o'ynaydigan futbolchilarni tarbiyalashimiz kerak. Lekin bunda murabbiylar shtabida ham, futbolchilarda ham g'alaba qozonish istagi bo'lishi kerak. Har bir o'yinda g'alaba qozonish va o'zimizda "g'oliblik ruhi"ni tarbiyalash kerak. Bularning barchasini birlashtirish kerak.