Sanjar SHoahmedov: “Temurxo'ja Abduholiqovning goli jamoaga g'alaba keltirdi”

Unda hamyurtlarimiz bo'lmish Temurxo'ja Abduxoliqov va Sanjar SHoahmedov to'p tepadigan “Al-Sayliya” o'z uyida “Umm-Salal” jamoasini qabul qilib hujumchimiz Temurxo'ja Abduxoliqovning goli evaziga 3 ochkoni qo'lga kiritdi. Ushbu bahsda Sanjar SHoahmedov ham faol ishtirok etdi. Bahsdan so'ng SHoahmedov ilk uchrashuvdagi taassurotlari haqida fikr bildirdi.

“Al-Sayliya” safidagi ilk uchrashuvimizni “Umm-Salal” jamoasiga qarshi o'tkazdik va kichik hisobda g'alaba qozondik. Ushbu bahsda Temurxo'ja Abduxoliqov raqiblar darvozasini penaltidan ishg'ol qildi. 11 metrlik jarima to'pini esa himoyachimiz ishlagandi. Biz uchun ushbu jamoadagi ilk o'yinimiz bo'lgani uchun biroz qiyinchilik bo'ldi.

Sekin-asta jamoaga moslashib olyapmiz. Kechagi o'yindan yaxshi taassurotlar qoldi. Ushbu bahsda men 70 daqiqa maydonda harakat qildim. O'yin yakuniga etganidan so'ng murabbiylar shtabi g'alaba bilan barchamizni tabrikladi. Raqib jamoa bizga qarshi yaxshi o'yin ko'rsatdi. Hech kimda hech qanday jarohatlar yo'q, hozircha barchasi yaxshi.

Uchrashuvda futbolchilar bilan bir-birimizni tushunib harakat qildik. Keyingi bahsni 26 yanvar kuni “Al-SHaxaniya” jamoasiga qarshi o'tkazamiz”, - deydi “Al-Sayliya” futbolchisi Sanjar SHoahmedov.

Jahongir Sotvoldiev