“SA”ning uch yilligi munosib nishonlandi

Yakshanba kuni bo'lib o'tgan tadbirni kuzatib borish uchun milliy terma jamoamiz azolari Server Jeparov, Sanjar Tursunov, Farhod Tojiev va Temur Kapadze tashrif buyurdi. Uchrashuvda ishtirok etish uchun Dilshod Nuraliev qo'l ostida BAAdagi o'smirlar jahon chempionatida qatnashgan Sarvar Karimov, Rustam Ashurmatov, Jamshid Boltaboev, Ibrohim Abdullaev, Javohir Siddiqov murabbiy bilan kelishdi. SHuningdek, yakunlangan mavsumda “Guliston”da faoliyat ko'rsatgan Baxtiyor Ashurmatov sayt tadbiriga bir qator futbolchilar bilan tashrif buyurdi. Aleksandr Lobanov, Akbar Ismatullaev, Abduqahhor Hojiakbarov, Sanat SHixov, Temur Hakimov sayt o'quvchilari bilan futbol o'ynash uchun keldilar.

Yakshanba kuni kuchli yomg'ir bo'lishiga qaramay, ushbu futbolchilar hamda mamlakatimizning turli hududlaridan 50ga yaqin muxlislar O'FF maydoniga to'planishdi. Bu juda quvonarli holat. Futbolchilar ham, ishqibozlar ham noqulay havoda tadbirda qatnashishni rad etishmadi. Darvoqe, tushlik paytida maydonda to'p tepayotgan “Paxtakor” akademiyasining yosh tarbiyalanuvchilari mashhur futbolchilarni ko'rib qolib, ular bilan birga suratga tushib olish va o'yinchilar harakatlarini kuzatish imkoniyatiga ega bo'lishdi. Bu o'sib kelayotgan yosh avlodda futbolga bo'lgan mehrni yanada o'stirishi tabiiy.

Futbolchilar hamda muxlislar ikki jamoaga ajratildi. Birinchi jamoa safida o'smirlar terma jamoasi azolariga qo'shilib Temur Hakimov o'ynadi. SHuningdek, ishqibozlar jamoani to'ldirishdi. Ikkinchi jamoa tarkibida Baxtiyor Ashurmatov, Akbar Ismatullaev, Sanat SHixov, Abduqahhor Hojiakbarov va Aleksandr Lobanov harakat qildi. Takidlash lozimki, katta futboldan ketgan bo'lishiga qaramay, Baxtiyor Ashurmatov himoyada avvalgidek ajoyib o'yinlari bilan ko'pchilikning olqishlariga sazovor bo'ldi. Jamoalar safida 10 nafardan futbolchilar to'p tepishdi. Muxlislar soni ko'pligi sababli ular har ikki jamoa safida tez-tez almashtirib turildi. SHu tariqa tadbirga kelgan barcha ishqibozlar futbolchilar bilan bir jamoada o'ynashiga imkoniyat taqdim etildi. SHuningdek, sayt ijodkorlari ham maydonga tushib, to'p tepib ko'rishdi.

Qiziqarli kurashlar ostida kechgan bellashuvda birinchi jamoa azolari 2:0 hisobida zafar quchishdi. Har ikki bo'limda bu jamoa azolari Lobanov darvozasini bir martadan ishg'ol qilishdi. Nodirxo'ja Yuldashev esa o'yin tugashiga 10 daqiqa qolganida g'alaba qozonib turgan jamoa darvozaboni bilan o'z joyini almashdi. O'zi u avvaldan, kim yutayotgan bo'lsa, o'sha jamoa davrozasida turishni rejalashtirgan edi. SHu tariqa do'stona va shou ruhida o'tgan bahs yakunlangach, futbolchilar va sayt foydalanuvchilari o'zaro suhbatlashib, bir-birlari bilan yaqindan tanishib ham olishdi. Hammasidan qizig'i, “Paxtakor” FK xalqaro bo'lim boshlig'i Faxriddin Isamuhamedov uchrashuv komissari vazifasini bajardi. FIFA agenti Ravshan Salimov esa futbolchilarni  yig'ishda o'z yordamini ayamadi. Tadbir mobaynida ishqibozlar o'zlari yoqtirgan futbolchilar bilan birga suratga tushib olish imkoniyatini ham qo'lga kiritishdi. Saytning 3 yoshga to'lganligi bilan tadbirga kelgan futbol ichidagi insonlar va muxlislar ijodkorlar tomon tabrik yo'llashganidan so'ng sayt ijodkorlari ham o'quvchilarga esdalik sovg'alarini taqdim etdi.

Tadbirning so'nggi qismi fotosessiyadan iborat bo'ldi. Yani, muxlislar va futbolchilar, shuningdek, saytimiz xodimlari birgalikda esdalik uchun suratga tushishdi. Sayt orqali “SA”ni tug'ilgan kuni nishonlayotganidan xabar topgan Server Jeparov va Timur Kapadze noqulay ob-havo sharoitiga qaramasdan o'z sovg'alari bilan stadionga tashrif buyurdilar. Ular orasida, O'zbekiston olimpiya qo'mitasining birinchi Vice-prezidenti va bosh kotibi Oybek Qosimov ham tadbirda ishtirok etdi. SHunday qilib, ijobiy ruhda o'tgan tadbirga yakun yasaldi. Sayt ijodkorlari nomidan tadbirga tashrif buyurgan barcha futbolchilar, murabbiy va muxlislarga minnatdorchilik bildiramiz. 

“SA-1” - “SA-2” 2:0.

Gol: Azamat Nazarov, 11. Javohir Siddiqov, 23.

“SA-1”: Sarvar Karimov (Nodirxo'ja Yuldashev), Rustam Ashurmatov, Jamshid Boltaboev, Ibrohim Abdullaev, Temur Hakimov, Javohir Siddiqov, Kattabek Ochilov, Azamat Nazarov va boshqalar.

Bosh murabbiy: Dilshod Nuraliev.

“SA-2”: Aleksandr Lobanov, Baxtiyor Ashurmatov, Sanat SHixov, Umarxo'ja Rasulxo'jaev, Fayzulla Saydullaev, O'tkir Adhamov, Mirshod Bekmurodov, Azizbek Ergashev va boshqalar.

Bosh murabbiy: Baxtiyor Ashurmatov.