Samvel Babayan: "Ertaga eng yaxshi o'yinimizni ko'rsatishga harakat qilamiz"

"Ertaga juda muhim o'yin kutib turibdi. Raqib guruhda birinchi o'rinda bormoqda. Juda kuchli va hurmatga loyiq jamoa. Biz KXDRning kuchli tomonlarini o'rganib chiqdik. Ertaga o'zimizning eng yaxshi o'yinimzni ko'rsatib g'alabaga erishishga harakat qilamiz. KXDRga qarshi muhim o'yin kutib turibdi, shu bois barcha muxlislarni stadionga chorlab qolamiz", - deb gap boshladi Samvel Babayan.

"Ertaga O'zbekiston xalqini xursand qilishga harakat qilamiz. Mashg'ulotlarda astoyidil ishladik. Nasib qilsa g'alaba qozona olamiz", - deydi Islom To'xtaxo'jaev.

- 18 nafar futbolchini aniqlab oldingizmi?

- Oldinda hali bir kun bor shu bois aniq ayta olmayman. Biroq taxminan kimlar qaydnomaga kirishini aniqlab oldik.

- Ertaga Toshkentda yomg'ir yog'ishi kutilmoqda. Bu sizning rejalaringizga o'zgartirish kiritadimi?

- Yo'q. Filippindagi o'yinda ko'rgan bo'lsangiz juda kuchli yomg'irda o'ynagandik. SHu bois bu borada muammo bo'lmaydi.

- Odil Ahmedov va Vitaliy Denisov Evropa ligasi, Rossiya chempionatida muhim hamda og'ir o'yinlarda ishtirok etishdi. Ular ertangi o'yinga qanchalik tayyor?

- Bu ikkala futbolchi professional hisoblanadi. Tiklanish uchun orada vaqt bo'ldi. Ertaga maydonga tushib o'zlarini ko'rsatishlariga ishonaman.

- Islom, KXDRda o'tgan o'yinda O'zbekiston mag'lub bo'lgandi. Bu ertangi bahsdan oldin sizlarga bosim o'tkazmaydimi?

- Yo'q, aksincha o'sha mag'lubiyat tasodif ekanini isbotlamoqchimiz.

Narzulla Saydullaev