Rustam Mirsodiqov: "SHu kunga qadar hujumchilarimiz "ochilishmayotgan" edi"

- “Men shogirdlarimni hamisha maydonga g'alaba qozonishga ruhlantirib tushiraman. Bugun ular berilgan ko'rsatmalarimizni to'liq bajarishdi. To'pni ko'proq nazorat etish, tezkor hujum uyushtirish, qanotlardan unumli foydalanishda ustunlikka ega bo'ldik. Tezkor gol esa o'yin taqdirini hal etdi. Birinchi va ikkinchi taymlar boshida raqib darvozasini ishg'ol etib olishimiz futbolchilarimizning o'z kuchlariga bo'lgan ishonchini oshirdi.

“Nasaf” ustidan safarda erishgan g'alabamiz albatta futbolchilar kayfiyatini ko'tardi. Ammo unutmang, biz “Bunyodkor”, “Paxtakor” jamoalariga qarshi ham tengma teng o'yin olib borgandik. Faqatgina hujumchilarimiz “ochilishmayotgandi”. Bugun mana SHahzod Nurmatov hisobini ochib oldi. O'ylaymanki, endi hujumchilarimizning ishlari yurishib ketadi.

“Andijon”ning “Navbahor”ga qarshi o'tkazgan uchrashuvini kuzatgandik. Andijonda juda ajoyib, kurashuvchan jamoa shakllangan. Biroq bugun tezkor gollar mehmonlarimizni dovdiratib qo'ydi. Bunday zarbalarga ular tayyor emas ekan.
Biz qaerda va kimga qarshi o'ynashimizga qarab taktika tanlaymiz. Qarshida qarshi hujumda o'ynadik. “Nasaf”ga qarshi uchrashuvda ham tezda gol kiritib olganimiz bizning foydamizga ishladi. O'z maydonimizda esa hujumkor futbol namoyish etishga majburmiz. Muxlislarimiz bizdan boshqacha futbol kutishmaydi.”