Rustam Do'rmonov: “Oxirigacha oliy ligada qolish uchun kurashamiz”

- Birinchi navbatda jamoamiz muxlislaridan uzr so'rayman. Futbolchilarimiz birinchi bo'limda yaxshi harakat qilishdi. Gol urish uchun bir qator imkoniyatlarga ham ega bo'ldik. Tezkor hujumchilarimizdan biri Abdumalik Abdullaev o'zi uchun yaratilgan vaziyatlarga golga aylantira olmadi. Ikkinchi bo'limda yosh bolalarga hos tarzda yo'l qo'yilgan xatolar darvozamizga ikkita to'p kiritilishiga olib keldi.

“Qizilqum” jamoasi mahorat borasida jamoasizdan bir bosh ustun ekanligini namoyish etdi. Aynan shu sababli raqib futbolchilari vaziyatlardan foydalanishdi, biz esa imkoniyatlarni golga aylantira olmadik. Oldimizda yana uchta tur bor. Hozirdanoq tushkunlikka tushish niyatimiz yo'q. Oxirigacha oliy ligada qolish uchun kurashamiz. Barchasi biz uchun ijobiy tarzda yakun topadi degan umiddaman. Ayni paytda bir qator futbolchilarimiz jarohat tufayli jamoaga yordam bera olishmayapti.

Akram Bahriddinov ham bugun jarohati bo'lishiga qaramay ukollar yordamida maydonga tushib, imkoniyat darajasida yordam berishga harakat qildi. Yo'qotishlar o'rnini yoshlarimiz safida to'p surayotgan futbolchilar bilan to'ldirishga majburmiz.

"Navbahor" matbuot xizmati