Ro'ziqul Berdiev: "Oybek Bozorov bizga keyingi o'yinlarda ham kerak. O'ylaymanki, uning jarohati jiddiy emas"

Ushbu uchrashuvdan so'ng jamoa bosh murabbiyi Ro'ziqul Berdiev fikrlari bilan o'rtoqlashdi.

"Mavsumdagi ilk g'alaba bilan muxlislarimizni tabriklayman. Har doim sifatli o'ynashga harakat qilamiz. Raqibimiz ko'proq himoyaviy o'yin qilib, bizni asabiylashtirishlari mumkinligini futbolchilarga aytib o'tgandik. Bugun shoshilmay, o'z o'yinimizdan chetga chiqmasligimiz kerak edi. Futbolchilar buni yaxshi uddalay olishdi. Ko'rdinglar, raqib dastlabki 20-25 daqiqada munosib qarshilik ko'rsata oldi. Birinchi goldan so'ng hammasi o'zgarib ketdi va ustunlik biz tomonga o'tdi. 

O'ylaymanki, Oybek Bozorovning jarohati jiddiy emas. U bizga keyingi o'yinlarda kerak. Hozir shifokorlar bilan gaplashamiz va hammasiga aniqlik kiritamiz.

Dilshod Saitovning chap qanotga tushirilishi reja o'zgargani bilan bog'liq emas. Uning o'zidan so'raganimda brovka (burchak)ga yaqinroq joyda o'ynashini aytdi. Balki oldinga borishga eringandir.

"Turon" ochiq futbol ko'rsatdi, demagan bo'lardim. Faqat birinchi goldan so'ng ularning rejalari o'zgarib ketdi", - deydi Ro'ziqul Berdiev.