Ronaldu endi sobiq jamoadoshi qo'l ostida to'p tepadi: Sulsher va Krishtianu bu haqida nima deydi?

Ronaldu va Sulsher 2003 yildan 2007 yilgacha MYUda birga to'p tepishgan. Ammo, jarohatlar Olega ko'p bor halal bergan. SHu sabab ular maydonda birgalikda bor yo'g'i 32ta o'yin o'tkazishgan. Keyin Ole faoliyatini yakunlagan va Ser Aleks Fergyuson shtabida hujumchilar murabbiyi sifatida ish boshlagan. O'sha davrda norvegiyalik mutaxassis portugaliyalikni shug'ullantirgan.

Klub rasmiy saytiga bergan eksklyuziv intervyusida Krishtianu Ole haqida juda ham iliq fikrlarni aytgan va murabbiy unga to'la ishonishi mumkinligini qo'shimcha qilgan.

"Biz biroz suhbatlashdik. Lekin, menda hali u bilan tet-a-tet (yuzma-yuz) gaplashishga imkon bo'ladi. O'shanda u nimani kutayotganini bilib olaman.

O'zingiz bilasiz, men u bilan "Manchester Yunayted"da 2 yoki 3 yil o'ynaganman. SHunday ekan, u bilan ajoyib munosabatdamiz. Lekin, endi meni rolim boshqacharoq: Men o'yinchi, u esa murabbiy.

Ammo bu endi ahamiyatga ega emas. U bilan munosabatlarimiz ajoyib. Avval ham aytganimdek, Manchesterga jamoaga yordam berish uchun kelganman, murabbiy istaganicha menga ishonch bildirishi mumkin. Men barchasiga tayyorman".

Klubning rasmiy bayonotida Sulsher o'z navbatida Ronalduga maydonda ham, uning tashqarisida ham ishonishini bildirdi 

"Krishtianuni tasvirlash uchun so'z etishmaydi. U nafaqat ajoyib futbolchi, balki ajoyib inson hamdir. Uzoq yil davomida mana shunday kuchli istak bilan va yuqori darajada o'ynash uchun boshqacha odam bo'lish kerak. 

U barchani hayron qoldirishda davom etishiga ishonaman, uning tajribasi tarkibdagi yosh futbolchilar uchun juda muhim. Ronalduning qaytishi jamoamizga etiborni kuchaytiradi, uning qaytganidan, barchasi boshlangan joyga qaytganidan juda xursandman".