La Ligada mavsum boshlanmadi, ammo birinchi istefo kim bo'lishi malum

Ispaniya chempionatida uch klub borki, ularda rahbariyat va menedjment emas, o'z vazifasidan tashqari o'sha rahbarlarning va menedjmentning ishini ham qoyillatadigan bosh murabbiy hisobiga faoliyat yuritadi.

Bular "Atletiko de Madrid", "Xetafe" va "Rayo Valekano".

Birinchisi tushunarli bo'lsa kerak: Diego Simeone klubdagi kamchiliklarni ustalik bilan berkitib ketadi va natijalar evaziga odatda, boshdan baland sakraydi. SHunga o'xshash tarifni Pepe Bordalas qiyin vaziyatda qutqarib qolgani "Xetafe" haqida aytish mumkin.

O'zi ishlayotgan klub rivojiga Andoni Iraola ham ulardan kam hissa qo'shmasdi. Ko'pchilik uni (Xose Luis Mendilibar ketishni istamayotgan) "Sevilya" darajasigacha ko'tariladi yoki hech bo'lmasa, Ernesto Valverdening "ketmoni uchmayotgan" "Atletik"ka qaytadi deb kutgandi.

Ammo Iraola APLga yo'l oldi va "Bornmut" boshqaruvini o'z qo'liga oldi. "Rayo Valekano" esa o'z yog'ida qovurilishiga to'g'ri keladigan bo'ldi. Baskning o'rnini Fransisko Rodriges egalladi. U hali ham yoshroq, lekin umidli yoshlardan hisoblanadi. 

To'g'ri, Fransisko va Iraola o'rtasida o'xshash jihatlar bor – har ikki murabbiy tezkor hujumlar bilan dinamik futbolni xush ko'radi va mayda paslar bilan qanotlarni "ochish"ga urg'u qilinadi.

Ammo, lekin, biroq... Muammo shundaki, Fransisko Iraolani to'laqonli ravishda alishtira olmaydi. Bu haqida u o'z taqdimotida ham aytib o'tdi: "Yangi ishim haqida odamlar nima deyayotgani meni qiziqtirmaydi. Odamlar ketganimdan keyin nima deyishlari menga qiziqroq".

Ushbu voqea esa o'zini uzoq kuttirmaydigan ko'rinadi. Sababi mavsum boshlanib ulgurmay "Rayo" muhim futbolchilari bilan xayrlashdi – himoyachilardan Lejen, Alexandro Katena va Fran Garsiyadan, Mario Suares, Komesanya va Kamelogacha.

Bu asosiy tarkibning yarmidan ko'p degani. Tabiiyki, sport menedjmenti shoshilinch ravishda "teshiklar"ni yopishga tushdi (misol uchun "Osasuna"dan Aridane Ernandez, "Levante"dan Xoni Montiel olib kelindi), ammo mavsum startigacha David Kobeno juda ham istasa ham tarkibni "to'ldirib" ulgurmaydi.

Fransisko esa bu qiyin vaziyatdan chiqishiga to'g'ri keladi. O'zi shundoq ham qudratli bo'lmagan va Iraolaning topqirligi evaziga "kun ko'rib yurgan" "Rayo Valekano"ning esa La Liganing aksariyat klublari singari, CVC moliya fondi bilan yaxshilab o'ylamay tuzilgan kelishuv oqibatida moliyaviy muammolari yanada ortgan.

Iqtidorli murabbiy sinib qolishini istamagan bo'lardik, lekin vaziyatga real qarasak, Fransiskoning istefo borasida birinchi bo'lish imkoniyati ancha yuqori.