Ла Лига. Аламзада "Атлетико" ўз уйида "Гранада"ни қабул қилади
20 апр 2022 15:45
Янгиликлар

Ла Лига. Аламзада "Атлетико" ўз уйида "Гранада"ни қабул қилади

Теглар : "Гранада""Атлетико Мадрид"Ла Лига

Испания чемпионати 33-тури доирасида Мадридда "Атлетико" - "Гранада" учрашуви бўлиб ўтади.

Бугун турли даражадаги футболчилар майдонда рўбаро келади ва пойтахтликлар рақибларидан деярли ҳар жабҳада устунроқ. Сўнгги бор ушбу клублар Мадридда тўқнаш келганда ўйин 6:1 ҳисобида мезбонларнинг ғалабаси билан якунланган. "Гранада" хавфли зонадан бир очкогагина олдинда ва бугун номдорроқ рақибига жиддий қаршилик кўрсата олмаса керак. Жамоалар бу мавсумни қандай ўтказаётганига назар ташласак.

"Атлетико"

"Атлетико" Чемпионлар Лигаси гуруҳ босқичини ишончли ўтказди, плей-оффнинг биринчи тўсиғи "Манчестер Юнайтед" ҳам ошиб ўтилди. Бироқ чоракфиналда Мадрид жамоаси Манчестернинг бошқа бир жамоасига муросасиз курашда имкониятни бой берди.

Ла Лигада Чоло жамоаси 18 ғалаба ва 6 дуранг қайд этиб, тўртинчи ўринни банд этиб турибди. Қизиқ жиҳати, "Барселона" (1 та захирада ўйини бор), "Севилья" ва "Атлетико"нинг очкоси тенг ва тўплар фарқигина ким нечанчи поғонада бўлиши ҳал қилмоқда. "Мальорка"дан учралган мағлубиятдан (0:1) кейин пойтахтликлар "Эспаньол"ни енгди (2:1).

Бугун "матрасчилар"га дисквалификация туфайли Фелипе Монтейро ва Жоффрей Кондогбья, жароҳат сабаб эса Хосе Хименес, Тома Лемар, Эктор Эррера ва мавсум охиригача сафдан чиққан Жоау Феликс ёрдам бера олмайди.

"Гранада"

Бу мавсум "Гранада"нинг ишлари юришмаяпти. 32 турдан сўнг жамоа 16-ўринни банд этиб турибди. 6 ғалаба ва 11 дуранг билан 29 очко жамғарган Айтор Каранка жамоаси охирги икки турда "Севилья" (2:4) ва "Леванте"га (1:4) имкониятни бой берди.

Қирол Кубогида "Гранада" дастлаб "Лагуна"ни (7:0) тор-мор этган бўлсада, кейинги босқичда кутилмаганда "Атлетико Манча"га (0:1) имкониятни бой берди.

Бугун меҳмонлар сафида дисквалификация туфайли Херман Санчес Бараона майдонга туша олмаса, Нейдер Лозано, Сантьяго Ариас, Карлос Нева, Рубен Рочина ва Рауль Торренте жароҳат сабабли ўйинни ўтказиб юбориши кутилмоқда.

"Атлетико"нинг бу мавсум ҳимоядаги ишлари юришмаётгандек. Бу Диего Симеоне жамоаси учун ғалати бир ҳолат. Жамоаларнинг охирги 3 ўйинида камида 3 тадан гол урилган. Ҳозирги Мадриднинг кучли томони эса бу ҳужум. Қизиқ, бугун қандай ўйин гувоҳи бўларканмиз?