Ravshan Haydarov: "Mag'lubiyatlar uchun muxlislardan uzr so'rayman"

"Uchrashuv muxlislarga yoqadigan, gollarga boy, qiziqarli o'yin bo'ldi. Bugun biz ko'plab yoshlarga imkon berdik. CHunki shunday o'yinlar orqali yoshlar ancha tajriba to'plashadi. Biroq uchrashuv boshida yigitlarim dovdirab qolishdi. Ikkita gol o'tkazib yuborib keyin oldinga chiqib olishimiz tajribali futbolchilar evaziga bo'ldi. G'alabali hisobni saqlab qola olmaganimizga sabab raqibning tajribali ekanligi bo'ldi", - deb gap boshladi Haydarov.

"Futbol - xatolardan iborat o'yin. Hakamlarning xatolaridan aziyat chekdik. Ammo qo'limizdan hech narsa kelmaydi. Igor Mixaylov ikki o'yinda Melnichukning o'rnini bilintirmaslikka urindi. Keyingi o'yinda Melnichuk maydonga tushishga tayyor bo'ladi. Farrux SHotursunov yaqinda og'ir jarohatdan chiqib asta-sekin o'ziga kelayotgandi. Bugungi o'yin hujumchi butun o'yin davomida harakat qila olishiga javob bo'ldi".

"Jamoamiz tarkibi yomon emas, bir qator sabablar tufayli ochkolar yig'a olmay qoldik. Bu mag'lubiyatlar uchun muxlislardan uzr so'rayman. Ko'plab jarohatlar bizni ancha qiynadi. O'z o'yinimizni to'liq ko'rsatishga xalal berdi. O'zgarishlar bo'lishi aniq, bu jamoaga past o'rinlarda yurishga loyiq emas", - deydi Ravshan Haydarov.


Behbud Erkinov yozib oldi.