Ravshan Haydarov: "G'alabadan boshqa yo'l yo'q!"

Ravshan Haydarovning aytishicha, 17 oktyabrdagi o'yinda ikki jamoa uchun ham qiyin o'yin bo'ladi va kuchli jamoa jahon chempionatiga chiqadi.

"Bizning terma jamoalarga katta vazifalar qo'yilgani kabi, ishqibozlar ham katta g'alabalar kutishadi. G'alabadan boshqa yo'l yo'q! Jahon chempionatiga chiqishni biz qanday istayotgan va kutayotgan bo'lsak, Tailand ham shunday kuchli istak bilan maydonga tushadi", - deb gap boshladi Ravshan Haydarov.

"Tailand ajoyib jamoa. Tezlik, kuch, g'ayrat va irodasi bo'yicha shu turning eng yaxshi jamoalaridan biri hisoblanadi. Guruh bosqichidagi oxirgi o'yinlari Tailandning har qanday sharoitda vaziyatni o'zgartirishga qodir jamoa ekanligini ko'rsatdi. Ob-havo, iqlim? Biz bu sharoitda birinchi marta o'ynamayapmiz va bu haqda bilar edik. SHularni inobatga olib tayyorgarlik ko'rganmiz. Ikki jamoa uchun ham qiyin, ishqibozlar uchun esa qiziqarli o'yin bo'ladi degan umiddaman", - deydi Haydarov.

Tailand terma jamoasi bosh murabbiyi Sasom Pobprasetning aytishicha, 17 oktyabrdagi chorak finalda O'zbekiston favorit hisoblanadi.

"Ertaga biz yutqazib qo'ysak odatiy qabul qilinishi mumkin, lekin O'zbekiston yarim finalga chiqolmasa rosa yangilik bo'ladi. O'zbekiston kuchli jamoa va ularga qarshi o'yin og'ir kechadi. Qolaversa, tarkibimizda muammolar, jarohat olganlar bor. Guruh bosqichidagi kambeklar chiqmasligi mumkin, chunki bu o'yin taqdiri bir o'yinda hal bo'ladi, 3 ta imkoniyat yo'q. Biz bor imkoniyatimizni ishga solamiz, kuchimizni berib o'ynaymiz, lekin raqibimizning kuchli ekanligini ham tan olamiz", - deydi Sasom Pobpraset.

O'zbekiston va Tailand o'rtasidagi chorak final 17 oktyabrda Toshkent vaqti bilan 17:30 da boshlanadi.

O'FF matbuot xizmati