Ravshan Ermatov Srechko Katanec boshchiligidagi murabbiylar shtabi bilan uchrashdi

"Dastlab terma jamoa bosh murabbiyi Srechko Katanec Gruziyada o'tgan yig'in natijalari hamda O'zbekistondagi faoliyatining dastlabki qismi borasida hisobot taqdim etdi. 

SHundan so'ng milliy jamoaning keyingi yilgi rejalari muhokama etildi. Xususan, sloveniyalik mutaxassis tayyorgarlikni yanvar oyidan boshlashni va mavsum oralig'ida bir nechta nazorat uchrashuvlari o'tkazishni reja qilayotganini malum qildi. 

O'z navbatida, Ravshan Ermatov kuchli raqiblarga qarshi o'rtoqlik uchrashuvlari amaliyotini davom ettirish borasida O'FA tomonidan barcha ishlar qilinishi, yurtimizda umidli, istedodli futbolchilar ko'pligini inobatga olgan holda, selekciya ishlarini doimiy tarzda amalga oshirish zarurligi, ayniqsa, yoshlarga etiborni oshirish va barcha futbolchilar milliy jamoada o'ynash uchun bir xil imkoniyatga ega bo'lishi kerakligini takidlab o'tdi. 

Terma jamoamizning 2022 yildagi to'liq taqvimi, o'yinlarning ehtimoliy sanalari, yig'in kunlari batafsil ishlab chiqildi. SHuningdek, bugungi kun talabidan kelib chiqib, futbolchilarning tibbiy tekshiruvini yanada chuqurlashtirilgan tartibda o'tkazishga kelishildi", – deya xabar berdi O'FA matbuot xizmati.