Rasman: Fozil Musaev “Al-Muayzer” bilan shartnoma tuzdi

Kecha oqshomda klubning yangi o'yinchilari – Musaev va Boliviya termasi pleymeykeri Jasmani Kampos jamoatchilikka rasman tanishtirildilar. Qatarliklarning yana bir haridi – bu CHernogoriya milliy termasi markaziy himoyachisi Djordje Djikanovich. Jamoaga yaqin kunlarda, shuningdek, Lotin Amerikasida kuchli beshlikka kiruvchi bir hujumchi kelib qo'shiladi.

24 yoshli Fozil Musaev “Al-Muayzer” tarkibida o'zi uchun sevimli bo'lgan 18-raqam ostida to'p suradigan bo'ldi.

Mazkur transfer borasida futbolchining agenti Sanat SHaripov quyidagi fikrlarni bildirib o'tdi: “Bizning oldimizda bir nechta variantlar mavjud edi. Ularni o'rganib chiqib, yakunda “Al-Muayzer” taklifini maqul ko'rdik. Bu jamoa o'z oldiga jiddiy maqsadlarni qo'ygan. Yozgi transfer mavsumida bir qator kuchli legionerlarni harid qildi.

Ko'pchilik yaxshi biladi, hozirda Qatar Yulduzlar Ligasi klublari jahon miqyosidagi futbolchilar bilan boyishmoqda. Raul, Nene (sobiq “PSJ”), Nodir Belxadj, Bakari Kone va boshqa ko'plab yulduzlarni keltirish mumkin. SHu bois ular qatoriga Fozil Musaevning qo'shilishi, menimcha, ijobiy bahoga loyiq. Agar markaziy yarim himoyachimiz yangi jamoasi tarkibida o'zini ko'rsata olsa, qolaversa, milliy termamiz bilan jahon chempionatiga chiqishga erishsa, kelajakda unga yanada kuchli klublardan takliflar bo'lishi turgan gap”.

Yangi jamoasi haqida Musaevning o'zi shunday deydi:
- Bugungi kunda o'zbek futbolining mavqei kun sayin yuksalib bormoqda. Men Qatar chempionatidagi o'z o'yinlarim orqali bu fikr ayni haqiqat ekanligini isbotlash niyatidaman. Klub rahbariyati menga bildirgan ishonchni to'liq oqlashga harakat qilaman.

***

Malumot o'rnida shuni aytish mumkinki, “Al-Muayzer” jamoasini ispaniyalik 61 yoshli mutaxassis Ladislas Losano boshqaradi. Qatar chempionati o'yinlarining boshlanishi esa sentyabrga mo'ljallangan. Ungacha mamlakat klublari SHayx Jassim kubogida qatnashadilar. “Al-Muayzer ” musobaqaning guruh bosqichida “S” guruhida “Al-Sadd” (21 iyul), “Al-Xor” (25 iyul), “Al-Xaritiyat” (2 avgust) va “Al-Mesaymir” (5 avgust) jamoalari bilan bahslashadi. 

B.Tursunov