Qosimov barcha ananalarga chek qo'ydi. "Andijon" chempion. Poytaxt klublari osmonida esa qora bulut - Superliganing 12-turi haqida

Mazkur tur davomida muxlislar bir qator qiziqarli uchrashuvlar guvohiga aylanishdi. Biz esa o'tgan o'yinlarga oid qiziqarli malumotlarni etiboringizga havola qilamiz. 

- "Metallurg"ning Superligadagi g'alabasiz seriyasi 11 ta o'yinga etdi. Jamoa so'nggi marotaba 2023 yilgi mavsumning so'nggi turida "Olimpik"ni taslim qilgandi. 

- "Surxon" Superligada so'nggi 4 ta o'yinda raqiblariga yutqazgani yo'q, 2 durang, 2 g'alaba. 

- Bekobodliklar 3 ta o'yindan beri "Surxon"ni yutishni uddalay olmayapti. Ular oxirgi marta 2022 yilgi mavsumda raqibidan 3 ochko tortib olgan. 

- SHahzod Ubaydullaev Superligadagi 95-uchrashuvida maydonga tushdi va 27 ta gol urdi. 

- Jahongir Abdusalomov faoliyatida ilk bor bitta o'yinda 2 ta gol urdi. 

- Qiziq fakt. "Metallurg" 2024 yildagi barcha mag'lubiyatlarni faqat mehmonda qabul qilib olmoqda. Mezbon maqomida esa hali yutqazgani yo'q va 4 bor durang qayd etdi. 

- "Navbahor" Superligada so'nggi 3 ta o'yinda raqiblar darvozasiga yo'l topa olmadi. 

- "Lochinlar"ning chempionat bahslaridagi g'alabasiz seriyasi 4 ta o'yinga etdi. 

- "Qizilqum" 3 yildan so'ng Namanganda "Navbahor"dan ochko oldi. Navoiyliklar bu ishni 2021 yilgi mavsumda uddalagandi. 

- Jamshid Saidov jamoasi Superligada 10 ta o'yindan beri o'yinlarni 3 ochkosiz tugatmoqda. Jamoa oxirgi bor joriy yilning 11 mart kuni "Surxon" ustidan zafar quchgandi. 

- "Navbahor" bu yil yutqazmagan yagona jamoa bo'lib turibdi. Namanganliklar Superligada oxirgi marotaba 2023 yilning noyabr oyida "Olimpik"ka engilgandi. 

- "Nasaf" o'z maydonida hali taslim bo'lmagan Superliganing ikkinchi jamoasi sifatida ketmoqda. 

- "Neftchi" mehmondagi so'nggi 4 ta o'yinning faqat 1 tasida yutuqni qo'lga kiritdi. 

- "Neftchi" ketma-ket ikkinchi mavsumda Qarshida gol ura olmadi. Bu ishni bajargan so'nggi "Neftchi" futbolchisi Izzatilla Abdullaev hisoblanadi. 

- Joriy yilda ilk bor "Neftchi" va "Nasaf" ishtirokidagi uchrashuvlarda avtogol qayd etildi. 

- Mirjalol Qosimov OKMK boshqaruviga kelganidan buyon ilk bor "Paxtakor"ni taslim qildi. Murabbiy mazkur vazifani so'nggi bor 2018 yil "Bunyodkor" bilan bajargandi. 

- OKMK chempionat doirasida esa 7 yildan so'ng "sherlar"ni mag'lub etdi. Bu ishni ular so'nggi marotaba 2017 yilgi mavsumning birinchi davrasida uddasidan chiqqandi. 

- Olmaliqliklar uyda ochko jamg'arish bo'yicha jadvalda birinchi o'ringa chiqib oldi, 16 ochko. 

- "Paxtakor" elitada 3 yildan keyin bitta o'yinda 4 ta gol o'tkazdi. Poytaxt klubiga so'nggi marotaba 2021 yilgi mavsumning 21-turida "Qo'qon-1912" 4 ta gol urishni uddasidan chiqqan edi.

- "Bunyodkor"ning "Olimpik" bilan o'yinlardagi yoqimsiz ananasi davom etdi. Bu ikki jamoa o'rtasidagi beshinchi o'yin sifatida tarixga kirdi. Mazkur bellashuvlarning 4 tasida durang, 1 tasida esa Timur Kapadze shogirdlarining qo'li baland kelgan. "Bunyodkor" esa uchinchi mavsumdirki "Olimpik"ni mag'lubiyatga uchrata olayotgani yo'q. 

- Bosh hakam mezbonlarning ikki futbolchisi Mirjahon Mirahmadov va Frane CHiryakka qizil kartochka ko'rsatdi. "Qaldirg'ochlar" uchrashuvni 9 kishi bo'lib tugatishga majbur bo'ldi. "Bunyodkor" futbolchilari O'zbekiston chempionatlari tarixida birinchi marta bitta o'yinda ikkita qizil kartochka oldi. 

- Temurxo'ja Abduxoliqov professional faoliyatidagi 418-uchrashuvida maydonga tushdi va 165-golini urdi.

- "Qaldirg'ochlar" ketma-ket to'rtinchi o'yinda maydonni g'alabasiz tark etdi. 

- "Bunyodkor" Superligada feyr-pley bo'yicha eng yomon jamoa bo'lib turibdi. Jamoa  futbolchilari 11 ta o'yinda 5 marotaba qizil kartochka bilan jazolandi. 

- "Temiryo'lchilar"ning Superligadagi g'alabasiz seriyasi 9 ta o'yinga etdi. Jamoa 14 mart kunidan buyon 3 ochko nimaligini bilmayapti. 

- "Lokomotiv" so'nggi 3 ta o'yinda "So'g'diyona"ni yuta olgani yo'q. Jamoa oxirgi bor 2021 yilgi mavsumda o'z maydonida raqibidan ustun kelgan. 

- "Dinamo" stadioni 588 kundan so'ng yana Superliga uchrashuviga mezbonlik qildi. So'nggi o'yin 2022 yil 26 noyabr kuni bo'lib o'tgan. 

- "Andijon" bu mavsum mehmonda eng ko'p ochko (11) jamg'argan jamoa bo'lib turibdi

- Samarqandliklar o'z maydonida 5 yildan beri "burgutlar"ni yuta olmayapti (oxirgi g'alaba 2019 yil, 2:1).