“Qo'qon-1912” bayram tadbirini o'tkazdi

Tadbirda Qo'qon shahar hokimi Akramjon Abdullaev, Farg'ona viloyat Futbol federaciyasi birinchi vice-prezidenti Tohir Kapadze, klub rahbarlari, murabbiylar, futbolchilar, OAV vakillari, “Markaziy” o'yingoh xodimlari va muxlislar ishtirok etishdi.

Tadbirda taniqli so'z ustasi, aktyor Anvar Mirzo boshlovchilik qildi. Dastlab Qo'qon shahar hokimi Akramjon Abdullaev tadbirni ochib berish uchun so'zga chiqdi.

– Assalomu alaykum hurmatli mehmonlar va futbolchilar. Barchangizni kirib kelayotgan yangi yil bilan tabrikayman, deb so'z boshladi Akramjon Anorqulovich. – Yakuniga etgan futbol mavsumi hayajonga boy bo'ldi, desam mubolag'a bo'lmaydi. Futbol muxlisi sifatida shuni aytishim joizki, jamoamiz Oliy ligadagi birinchi mavsumini yomon o'tkazgani yo'q. Bazan g'alaba qozonildi, gohida mag'lubiyatga uchradik.

Qo'qonlik futbol muxlislari o'ta talabchan. SHuning uchun yangi mavumda jamoa oldiga 6-o'rinni olish vazifasini qo'yamiz. Buning uchun “Qo'qon-1912” jamoasida barcha imkoniyatlar mavjud. Yangi bosh murabbiy sifatida ish boshlagan Murodjon Ismoilovga ham omad tilayman, dedi Akramjon Abdullaev.

Klub vice-prezidenti Baxtiyorjon Tolipov o'tgan yilgi natijalar haqida qisqacha to'xtalib o'tgach, mavsum davomida “Qo'qon-1912” jamoasi sharafini munosib himoya qilgan futbolchilarga qimmatbaho sovg'alar taqdim etildi.

Aytgancha, OAV xodimlari ham shu kuni klub tomonidan taqdirlanishdi. Xususan, yil davomida klub bilan hamkorlik qilib kelgan O'zbekiston teleradiokompaniyasi “Sport” telekanalining Farg'ona viloyatidagi muxbiri Behzod Jo'raboev, “Futbol Ekspress” va “Futbol info” gazetasi tahririyatlariga klubning “Tashakkurnoma”si hamda qimmatbaho sovg'alar berildi. SHuningdek, 86 yoshli faxriy jurnalist Mo'ydinjon Yo'ldoshev ham klubning qimmatbaho sovg'asi bilan taqdirlandi. Farxiy jurnalistining “Qo'qon-1912” jamoasiga bag'ishlangan sheri yig'ilganlarda yaxshi taassurot qoldirdi.

SHundan keyin so'z navbati Farg'ona viloyat Futbol futbol federaciyasi birinchi vice-prezidenti Tohir Kapadzega berildi. Bir necha yil Qo'qonda faoliyat olib borgan taniqli mutaxassis barchani yangi yil bilan tabriklar ekan, qisqacha o'tgan yilgi natijalarni yodga olib o'tdi. SHuningdek, Tohir Kapadze yangi mavsum oldidan yangi murabbiy va “Qo'qon-1912” jamoasiga omad tiladi.

Tadbir davomida jamoa sardori Aziz To'xtaboev, muxlislar klubi nomidan Qahramonjon Isroilovlar so'z berildi.

Tadbirda yangragan diltortar qo'shiqlar barchaga xushkayfiyat ulashdi. Bir so'z bilan aytganda, ushbu tadbir jamoa azolariga quvonch baxsh etdi.

SHu tariqa Qo'qon-1912 futbol klubi ortda qolgan mavsumni yuqori kayfiyatda tugatdi.

Aytgancha, endi futbolchilarga yangi yil munosabati bilan qisqacha tatil berildi. Ikkinchi yig'in 4 yanvar kuni Toshkentda boshlanadi.