"Qizilqum": Erkin Jabborov mashg'ulotlarga qo'shildi

Ayni chog'da bosh murabbiy Yuriy Lukin qo'l ostida futbolchilar Navoiydagi "So'g'diyona" stadioni va "Yoshlar" sport majmuasi yashil maydonlarida mashg'ulotlarni davom ettirishyapti.

Malumki, hozirda Dubayda milliy terma jamoamiz navbatdagi o'quv mashg'ulot yig'inini o'tkazmoqda. Hujumchimiz Navro'zbek Alimov mazkur yig'inda ishtirok etayotgan bo'lsa, yosh va umidli darvozabonimiz Dilshod Hamroev esa Myanmada yoshlar o'rtasida davom etayotgan Osiyo chempionatida yurtimiz sharafini himoya qilmoqda.

Quvonarlisi, deyarli butun mavsumni jarohatini davolash bilan o'tkazgan mohir darvozabon Erkin Jabborov yana jamoaning umumiy mashg'ulotlariga qo'shildi.

- Jarohat - futbolchining asosiy dushmani sanaladi, - deydi Erkin Jabborov. - Bu yilgi chempionatda atigi bir o'yinda maydonga tushdim. Birinchi davrada jamoamizning Farg'onada "Neftchi"ga qarshi o'tkazgan uchrashuvidan so'ng, oyog'imdagi jarohat qayta bezovta qildi. Natijada Moskvada jarrohlik stoliga yotishga majbur bo'ldim. Futbolchi uchun o'z jamoasi o'yinlarini maydon tashqarisida turib kuzatish juda og'ir. SHukrki, hammasi ortda qoldi. Hozirgi holatim yomon emas. SHifokorlar umumiy mashg'ulotlarga qo'shilishimga ruxsat berishganidan xursandman. Murabbiylar imkon berishsa, qolgan uchrashuvlarda o'z jamoamga albatta yordam berishga harakat qilaman.

Eslatib o'tamiz, "Qizilqum" futbolchilari yigirma uchinchi turda Namanganda "Navbahor" jamoasi mehmoni bo'ladi. Uchrashuv 17 oktyabr kuni soat 17.00 da boshlanadi.