Pro liga. Otabek Zokirov: “Neftchi”ga quyi ligalarda yurish yarashmaydi”

Joriy yilda Superligaga chiqishni ko'zlayotgan farg'onaliklar 13 iyun kuni yig'in doirasidan o'rin olgan “Turon”ga qarshi nazorat bahsida maydonga tushadi. Mazkur bellashuvdan oldin qishki transferlar vaqtida jamoaga kelib qo'shilgan Otabek Zokirovga yuzlandik.

“Asosiy maqsadimiz Superligaga yo'llanma olish. Qishki yig'inlar vaqtida yangi mavsumga yaxshi tayyorgarlik ko'rgandik. Lekin, ko'rdingiz karantin boshlanib rejalar o'zgarib ketdi. Barcha futbolchilar individual tarzda uyda shug'ullandi. Barchasini endi boshidan boshlayapmiz. Nasib qilsa bir kuch bo'lib va birlashib yuqori marralarni zabt etishga harakat qilamiz.

Karantin sababli o'yin amaliyotisiz qolib ketdik. Hozirda nazorat bahslari orqali optimal sport formasiga kirib olishga etibor qaratyapmiz. “Neftchi” jamoasiga Pro ligada yurish yarashmaydi. Bilasiz, bu jamoa o'ziga xos tarixga ega. Halol mehnat qilib maqsadimizga erishishimizga ishonaman.

O'zim bo'sh vaqtni oila davrasida o'tkazdim. Koronavirus tezroq engilishini barcha istamoqda. Klubimiz rahbarlari moliyaviy tomondan qo'llab-quvvatlab turishsa albatta Superligaga chiqamiz degan umiddaman.

Havo harorati isib borayotgani sababli bundan buyon mashg'ulotlarda chidamlikka va jismoniy holatimizni yaxshilashga urg'u qaratamiz. O'zimizga bo'lgan ishonch yuqori darajada”,- deydi Otabek Zokirov.