Про лига. Отабек Зокиров: “Нефтчи”га қуйи лигаларда юриш ярашмайди”

Жорий йилда Суперлигага чиқишни кўзлаётган фарғоналиклар 13 июнь куни йиғин доирасидан ўрин олган “Турон”га қарши назорат баҳсида майдонга тушади. Мазкур беллашувдан олдин қишки трансферлар вақтида жамоага келиб қўшилган Отабек Зокировга юзландик.

“Асосий мақсадимиз Суперлигага йўлланма олиш. Қишки йиғинлар вақтида янги мавсумга яхши тайёргарлик кўргандик. Лекин, кўрдингиз карантин бошланиб режалар ўзгариб кетди. Барча футболчилар индивидуал тарзда уйда шуғулланди. Барчасини энди бошидан бошлаяпмиз. Насиб қилса бир куч бўлиб ва бирлашиб юқори марраларни забт этишга ҳаракат қиламиз.

Карантин сабабли ўйин амалиётисиз қолиб кетдик. Ҳозирда назорат баҳслари орқали оптимал спорт формасига кириб олишга эътибор қаратяпмиз. “Нефтчи” жамоасига Про лигада юриш ярашмайди. Биласиз, бу жамоа ўзига хос тарихга эга. Ҳалол меҳнат қилиб мақсадимизга эришишимизга ишонаман.

Ўзим бўш вақтни оила даврасида ўтказдим. Коронавирус тезроқ енгилишини барча истамоқда. Клубимиз раҳбарлари молиявий томондан қўллаб-қувватлаб туришса албатта Суперлигага чиқамиз деган умиддаман.

Ҳаво ҳарорати исиб бораётгани сабабли бундан буён машғулотларда чидамликка ва жисмоний ҳолатимизни яхшилашга урғу қаратамиз. Ўзимизга бўлган ишонч юқори даражада”,- дейди Отабек Зокиров.