Plyaj futboli: O'zbekiston jahon reytingida 71-o'rinda qayd etildi

Plyaj Futboli jamoalari reytingini hisob-kitob qilib boradigan plyaj futboli xalqaro reytingi dunyo terma jamoalarining so'nggi to'rt yillik reytingini elon qildi. Unga ko'ra, plyaj futboli bo'yicha O'zbekiston terma jamoasi jahon reytingida 71-o'rinda qayd etildi. Mazkur reyting 2011 yilning may oyidan, 2014 yilning aprel oyigacha vaqt oralig'ida bo'lib o'tgan rasmiy musobaqalardagi terma jamoalarning ishtirokiga qarab tuzib chiqildi. Jahon chempionati, qita chempionatlari va saralash o'yinlaridagi natijalar terma jamoalarning reyting ochkolarini hisoblab borishda asosiy mezon sifatida qayd etilgan.

O'zbekiston terma jamoasi jahon reytingida 71-o'rinda, Osiyo Qitasi terma jamoalari reytingida esa 15-o'rinda bormoqda. Osiyo qitasining eng yaxshi terma jamoalari sifatida Eron (10), BAA (13) va Yaponiya (15) terma jamoalari qayd etilgan. Plyaj futboli bo'yicha jahon reytingini so'nggi ikki Jahon chempionati g'olibi – Rossiya boshqarib turibdi. Kuchli uchlikni Braziliya va Ispaniya terma jamoalari to'ldirishgan.

Eslatib o'tamiz, ayni damda Ahad Yusupov bosh murabbiylik qilayotgan plyaj futboli bo'yicha O'zbekiston terma jamoasi o'tgan yilning yanvar oyida Qatarda bo'lib o'tgan JCH-2013 saralash bahslarida ishtirok etishgan edi. JCH yo'llanmasi o'ynaladigan plyaj futboli bo'yicha navbatdagi Osiyo CHempionati bahslari 2016 yili o'tkazilishi rejalashtirilgan.