Piter Xyuistra: "Futbolda bitta golga ham, to'rtta golga ham uch ochko beriladi. Srechko Katanec ikki bor mashg'ulotimizni kuzatdi"

"Bugun oldingi o'yinlarga nisbatan yaxshiroq to'p tepdik. Kuchli raqibga qarshi futbolchilar o'zlarini ko'rsata olishdi. Katta ishtiyoq ko'rsatishdi. Ular yana harakatlariga qo'sha olishadi. Mazkur g'alaba chempionlik sari qo'yilgan katta qadam hisoblanadi",- deydi Piter Xyuistra. 

- "Paxtakor" ketma-ket beshinchi o'yinni 1:0 hisobida yakunlamoqda. Avvalgi o'yinlarda bitta goldan so'ng boshqa hujumga o'tmayotgandi. Bugun esa buning aksini ko'rdik...
- Futbolchilar kuchli raqibga o'zlarini ko'rsatish uchun ham boshqacha ishtiyoq bilan to'p tepishadi. Bu ko'proq ruhiy tomonga bog'liq. Yaxshi saviyadagi futbolchilar doim bunday raqiblar bilan bahslarda harakatlarini kuchaytirishadi.

- Jamoa o'tgan yilgiga qaraganda zerikarliroq o'ynamoqda. Kam gol uryapti. Bu borada nima deya olasiz?
- Futbolda bitta golga ham, to'rtta golga ham uch ochko beriladi. Men taqqoslamagan bo'lardim. Eng muhimi g'alaba. Hozirga kelib biz eng yaqin taqibchimizni 14 ochkoga ortda qoldirdik. Har doim ham bir xil o'ynashning iloji yo'q. Futbolchilar ham inson. Yuqoriga ko'tarilish yoki pasayish bo'ladigan holat. Muxlislarning yo'qligi ham futbolga tasir qiladi. O'yinchilar boshqacha to'p tepadi. Tez orada kasallik kamayishini, ishqibozlar stadionlarga qaytishlarini istayman. 

- SHerzod Azamov bir necha yillardan beri barqaror o'ynab kelmoqda. Uning terma jamoaga chaqirilmagani sizni tashvishlantiradimi?
- SHerzod eng yaxshi ko'rgan futbolchilarimdan biri. Bizning o'yin falsafamizga to'liq mos tushadi. Juda ko'p himoyachilar to'pni oldinga tepib yuboradi. SHerzod esa aql bilan qaror chiqaradi. Pozicion hujumlarni yaxshi boshlay oladi. U bitta xato qilsa ham o'zini yo'qotib qo'ymaydi. Endi har bir murabbiyning o'z qarashlari bor. Balki Srechko Katanec terma jamoaga chaqirar. U ikki bor o'yinimizni, mashg'ulotlarimizni kuzatdi.