PFL "Termiz voqeasi"ga beetibor bo'lmasligi lozim

Buning oqibatida o'yin oxirida uchrashuv bosh hakami Igor Xudaydatov naqd sakkiz (!) futbolchiga birdaniga qizil kartochka ko'rsatdi. Bularning hammasi 90+4-daqiqada yuz berdi.

Bosh hakam har ikkala jamoaning to'rt nafardan futbolchisini chetlatdi. Bundan ko'rinib turibdiki, maydonda ommaviy mushtlashuv sodir bo'lgan. Maydondan chetlatilgan futbolchilar: "Surxon" tarkibida - Timur Mamadaliev, Najmiddin Normurodov, Sanjar SHomurodov, Akmal Abdurahmonov; "Andijon" tarkibida - Ibrohim Otaxonov, Akbar Xo'jaev, Sanjar Asqaraliev, Farhod Bekmurodov.

O'yin 2:2 hisobida yakun topgan. Uchrashuvda dastlab "Surxon" futbolchisi Sanjar SHomurodov hisobni ochgan. Keyinchalik birinchi taymning o'zida "Andijon"da to'p tepayotgan taniqli hujumchi Anvar Berdiev hisobni tenglashtirgan.

75-daqiqada Nizom Norov penaltidan gol urib yana "Surxon"ni hisobda oldinga olib chiqadi. 90-daqiqada esa Alisher Abduvohidov to'p kiritib, hisobning 2:2 bo'lishini taminlaydi.

Mana shundan so'ng nima bo'lgani bizga to'liq malum emas. Lekin janjal chiqqani aniq. CHunki birdaniga bir daqiqa ichida 8 futbolchiga qizil kartochka berish uchun albatta nimadir xunuk voqea yuz bergan bo'lishi shart.

Birdaniga 8 nafar futbolchiga "qizil" berish holati (tag'in bir daqiqa ichida) hali dunyo futbolida kuzatilmagan bo'lsa kerak. Xo'sh, PFL qanday yo'l tutadi? O'yin va o'yin atrofida atroflicha tekshiruv o'tkazadimi? "Termiz voqeasi" sabablari chuqur o'rganiladimi? Har ikkala klub vakillari tashkilotga chaqirilib voqea yuzasidan tushuntirish berishadimi? Aybdorlar jazolanadimi?

Bizning fikrimizcha, PFL mana shunday pallada katta sahnaga chiqishi hamda "Termiz voqeasi" yuzasidan rasmiy bayonot berishi lozim. Va bu bayonot OAVda yoritilishi shart. Agar vaziyatga panja ortidan qaraladigan bo'lsa, yara yanada kattalashib ketaveradi.

Xayrulla Xoliqov.