Penalti to'g'ri bekor qilindimi? O'zbekiston - Eron uchrashuvi hakamlik faoliyati tahlili

Xardanining chetlatilishi:

- Hakamning qaroriga qo'shilaman. Eron termasi futbolchisi to'p uchun kurashga juda xavfli tarzda qo'shilmoqda va raqibining oyog'iga tepmoqda. U raqibining tayanch oyog'iga butsasining tag qismi bilan tegdi. Bu ham muhim faktor. Barcha kriteriyalar qizil kartochka demoqda.

Alijonovning penalti bo'yicha vaziyati:

- Hakamda penalti belgilash uchun asoslar bor, biroq etarlicha emas. Eron termasi futbolchisi to'p uchun o'ynashga harakat qildi va raqibini ko'rmadi, shu orqali uning beliga tegib yubordi. Penalti belgilash uchun faqatgina zarbaning kuchi muhim ahamiyatga ega emas - agarda himoyachi raqibining yuziga katta kuch bilan ursa, penalti uchun asos etarlicha bo'lardi. O'zbekiston termasi futbolchisi vaziyatni bo'rttirib yubordi.

Ashurmatovning vaziyatidagi penaltining bekor qilinishi:

- Juda qiziq vaziyat. UEFA va FIFA VARning vaziyatga aralashishi va qo'lning traktovkasi bo'yicha alohida yo'nalishga ega. Evropada bunday holatlarda katta ehtimol bilan penalti qo'yilgan bo'lardi. Lekin OFK hakamlik yo'nalishini asosan FIFAga qarab belgilaydi. Bu erda videoassistentlar bosh hakamning qaroriga qo'shilmagani uchun VAR ishga aralashdi. Qoidalarda qo'l nafaqat tabiiy turgan holatda, balki notabiiy holatda ham tana uzunligini oshirish mumkin deb yozilgan. Bunday holatda qo'l tabiiy holatda tana uzunligini oshirgan, yani, O'zbekiston termasi futbolchisining qadamiga ko'ra qo'li harakatlangan. SHu sababli uning qo'li elkasidan tepaga o'tib ketmagan va cho'zilmagan. Bunday holatda penaltini bekor qilish uchun asoslar etarlicha. Lekin Evropada VAR bunday holatda ishga aralashmasdi.