O'zbekiston U-16 terma jamoasi Xitoy yig'inini yakunladi

O'smirlarimiz Xitoyda dastlab Mo'g'uliston U-16 terma jamoasiga qarshi uchrashuvda 12:0 hisobida zafar quchishdi. Ikkinchi bellashuv Xitoy U-17 terma jamoasi bilan o'tkazilib, unda jamoamiz 0:2 hisobida imkoniyatni boy berdi. Xitoy ushbu bahsda bir yosh katta futbolchilardan iborat terma jamoasi bilan harakat qildi.

Xitoydagi yig'in va keyingi rejalar xususida Olimxo'jaev quyidagicha takidladi:

- Xitoydagi yig'in biz uchun foydali bo'ldi. Aksariyat futbolchilar yozgi dam olishdan qaytishgani sababli jismoniy holatlarini yaxshilash ustida ishladik. Mo'g'ulistonni yirik hisobda mag'lub etdik. Xitoyliklar shogirdlarimdan kattaroq bo'lishsa-da, o'yin bo'yicha ulardan deyarli qolishmadik. Vaziyatlardan foydanala olmaslik pand berdi. Yig'in mobaynida xatolarimizni aniqlab, tegishli xulosalar chiqardik. Navbatdagi yig'inlarda shu jihatlarga etibor qaratamiz.

25 avgust kuni Toshkentda yig'ilib, mashg'ulotlarni boshlaymiz. 31 avgust kuni Qatarga yo'l olib, 2 va 4 sentyabr kunlari Qatar o'smirlar terma jamoasiga qarshi 2 nazorat bahsida maydonga tushamiz. Keyin esa Falastinda o'tadigan saralash bahslarida ishtirok etamiz. Hozircha tayyorgarligimiz reja asosida ketmoqda.

O'zbekiston U-17 o'smirlar terma jamoasi 16-20 sentyabr kunlari Falastinda o'tadigan saralash bellashuvlarida Maldiv orollari, Falastin va Yaman termalariga qarshi o'ynaydi.