O'zbekiston Kubogining 1/8 finaliga qura tashlash marosimi jonli ko'rsatiladi

Marosim 18 aprel kuni soat 20:00 da boshlanadi.

Nega aynan 18 aprel?

O'zbekiston Kubogining 1/16 final uchrashuvlari 15-16 aprel kunlari bo'lib o'tadi. Ulardagi juftliklar, o'yinlar kuni va vaqtini mazkur havola yordamida bilib olish mumkin.

16 aprel kuni Qarshining “Nasaf” klubi CHempionlar Ligasi doirasida “Al-Vasl” (BAA) mehmoni bo'ladi. Toshkentning “Lokomotiv” klubi esa 17 aprel kuni o'z maydonida Eronning “Zob Ohan” klubini qabul qiladi.

O'zbekiston Superligasining 7-tur bellashuvlari 19 aprel kuni start oladi va 21 aprelga qadar davom etadi. PFL va “Sport” o'zaro kelishib, o'rtada bo'sh qolayotgan 18 aprelni qura marosimi uchun tanlab oldi.

Bu nima beradi?

1/8 finaldan boshlab musobaqaga “Lokomotiv”, “Nasaf”, “Paxtakor” va “Bunyodkor” klublari ham qo'shiladi. Qura marosimining jonli efirga uzatilishi futbol muxlislarining qiziqishiga sabab bo'lishi katta ehtimol. Qolaversa, undagi shaffoflik O'zbekiston Kubogida ishtirok etayotgan klublarga motivaciya o'rnida xizmat qilishi mumkin.

Eski formatda jamoalar o'zlarining ehtimoliy bo'lajak raqiblari haqida bilib turgan bo'lsa, endilikda bunga yo'l qo'yilmaydi. Bunda barcha jamoa bir xil maqomda bo'lib, istalgan boshqa klubga raqib bo'lib qolishi ehtimolini kutadi.

Hozirgacha...

O'tgan vaqt davomida maqomi jihatdan 1/32 finalga teng bo'lgan o'yinlar o'tkazildi. Unga ko'ra, “Iftixor” hamda “SHerdor” klublari 1/16 final chiptasiga ega chiqishdi. 15-16 aprel kunlari bo'lib o'tadigan 1/16 final bosqichi faqatgina bitta o'yindan iboratdir. G'olibni 120 daqiqa davomida aniqlashning iloji bo'lmasa, penaltilar seriyasiga murojaat qilinadi. Mazkur bosqichda qaysi jamoa o'z uyida harakat qilishini qura belgilab bergan. Mazkur qoida yarim finalgacha o'z kuchida qoladi.