O'tgan yili Toshkentga kelgan Misr Olimpiya termasining necha nafar futbolchisi Parijdagi musobaqada ishtirok etmoqda?

Bugun Parij shahrida o'tkazilayotgan Olimpiya o'yinlari guruh bosqichining ikkinchi tur uchrashuvlariga start beriladi. "C" guruhida tur doirasida O'zbekiston — Misr uchrashuvi o'tkaziladi. Nant shahridagi "Bojuar" stadionida o'tkaziladigan bellashuv Toshkent vaqti bilan 20:00 da boshlanadi.

Timur Kapadze qo'l ostidagi O'zbekiston Olimpiya terma jamoasi dastlabki turda Ispaniyaga 1:2 hisobida imkoniyatni boy berib qo'ydi. Braziliyalik mutaxassis Rojerio Mikale murabbiyligidagi Misr esa Dominikan Respublikasi bilan 0:0 hisobida durang o'ynadi.

Misr Olimpiya terma jamoasi o'tgan yilning oktyabr oyida Toshkentda o'zbekistonlik tengqurlarini mag'lub etgandi.

Mazkur uchrashuvda qaydnomaga kiritilgan futbolchilarning 12 nafari Parij Olimpiadasida ishtirok etmoqda. SHuningdek, "firavnlar" ikki nafar yoshi katta o'yinchi xizmatidan foydalanmoqda. Ulardan biri "Bazel" va "Arsenal"dagi o'yinlari bilan tanilgan, joriy mavsum so'ngida londonliklarni tark etgan Muhammad El Neni bo'lsa, ikkinchisi mamlakatning etakchi klublaridan biri "Zamalek"da to'p tepadigan Ahmad Mustafo Said Zizu hisoblanadi.

Eslatib o'tamiz, Toshkentda o'tgan o'rtoqlik uchrashuvida misrliklar 2:1 hisobida g'alaba qozongan. Mazkur bellashuvning ikkinchi bo'limi boshlarida Mahmud Mahamadjonov maydondan chetlatilgandi. SHuningdek, Rustam Lutfullin boshchiligidagi hakamlar brigadasi tomonidan Hojimat Erkinovning haqqoniy goli ofsayd qayd etilgan holda inobatga olinmagan va boshqa ko'plab xatoliklar kuzatilgan.