Otabek G'ulomxo'jaev: Evropa biz uchun yangi chaqiriq va biz raqiblarimizdan cho'chiyotganimiz yo'q

Uchrashuv oldidan bo'lib o'tgan tanishuv marosimida O'zbekiston yoshlar terma jamoasi bosh murabbiyi Otabek G'ulomxo'jaev ishtirok etdi. Mutaxassis shotlandlarga qarshi o'yin ancha qiziqarli kechishini aytib o'tdi. Boisi mazkur raqib O'zbekiston uchun yangilik bo'ladi, shuningdek, katta ehtimol bilan SHotlandiya termasi ham raqibidan nima kutishni bilmaydi.
 
“Ha, raqiblarimiz bizdan bir yoshga katta. Ha, ular Evropaning ko'zga ko'ringan jamoalari. Ammo aytishim kerakki, biz ularga yaxshigina bosh og'riq bo'la olamiz. Yigitlarim o'yinga tayyor deb ayta olaman”, — deb gap boshladi Otabek G'ulomxo'jaev.
 
“Biz uchun natija muhim emas, buni O'FA rahbariyati ham aytib o'tgan. Muhimi evropalik futbolchilar tezligiga yaqinlashish, ular orqali kamchiliklarimiz va nozik nuqtalarimizni aniqlab olish. Bunday raqiblarga qarshi o'yinlar o'sishimizga katta yordam beradi. Bizda hayajon yoki hadiksirash yo'q. Biz har qanday jamoa bilan tengma-teng o'ynashga harakat qilamiz”.
 
Otabek G'ulomxo'jaev yig'inning Evropada o'tayotgani masalasi borasida ham fikr bildirdi: “Termalarimiz arab jamoalari bilan, SHarqiy Osiyo vakillari bilan o'ynashga moslashib bo'lishdi. Ayni vaqtda O'FA olib borayotgan siyosatni to'liq qo'llab-quvvatlayman. Evropa yig'inlari mana shu mintaqa jamoalariga yaqinlashib olish uchun ham juda kerak. Mayli, mag'lubiyatlar bo'lsin, mayli kamchiliklarimiz yaqqol ko'rinsin. Muhimi ularni shunday bartaraf etaylikki, keyinroq Osiyo maydonlarida bizga oson bo'lsin”.
 
2018 yilgi mavsumda O'zbekiston milliy terma jamoasi o'zi uchun yangilik bo'lgan Marokash, Senegal, Urugvay qarshi termalarga qarshi o'yinlarda maydonga tushdi. O'zbekiston U23 termasi esa Keniya bilan to'qnash keldi. Oldinda yoshlarimizni SHotlandiya, Belgiya hamda Franciyaga qarshi uchrashuvlar kutib turibdi. O'smirlarimiz esa La Liga ishtirokchisi bo'lgan “Eybar” klubining U15 jamoasiga qarshi o'ynaydi. Bu kabi yig'inlar va o'rtoqlik o'yinlari 2019 yilgi mavsumda ham davom etadi.