Otabek Akramov: "Ittifoq-Navoiy" jamoasida tajribali futbolchilarning o'rni muhim"

"Ittifoq-Navoiy" jamoasi dastlab viloyat chempionatida ikkinchi liga bahslarida ishtirok etgan. O'z oldiga yuqori maqsad qo'ygan xolda joriy mavsumdan V PRO-Liga musobaqalarida ishtirok etmoqda. Jamoamiz Qiziltepa tuman hokimligi tashabbusi Navoiy viloyati Yoshlar Ittifoqi bilan memorandum imzoladik va xamkorlikda ish olib bormoqdamiz.

Jamoamiz oldiga joriy mavsumda turnir jadvalida imkon qadar yuqori o'rinlarni qo'lga kiritish vazifasi qo'yilgan. Biz chempionat davomida jamoamizning haqiqiy kuchini, nimalarga qodirligini his etib bormoqdamiz. "Ittifoq-Navoiy" yangi shakllanayotgan, sinov jarayonidagi jamoa. SHundan kelib chiqqan xolda uchrashuvlarda har-xil tarkib va turlicha uslublarni tajribadan o'tkazib ko'rayapmiz. Oxirgi ikkita turda g'alaba qozondik, bu qaysidir manoda jamoamiz azolariga qo'shimcha ishtiyoq berishi tabiiy xol.
Jamoamizda yosh iqtidorli futbolchilarni tarbiyalash va shakllantirish, yuqori chempionatlarga etkazib berish asosiy maqsadlarimizdan biri hisoblanadi. Lekin jamoamizni to'liq shakllantirib olish, chempionatdagi raqobatga dosh berish uchun hozirgi kunda tajribali futbolchilar xizmatidan foydalanyapmiz, ularning o'rni hozir juda muhim. Muntazam yoshlarni kuzatib bormoqdamiz, Navoiy viloyati futbol akademiyasidan ko'z ostimizga olib qo'ygan yosh futbolchilar bor, nasib etsa davralar oralig'ida ularni tarkibimizga jalb etamiz.

Hozir bizda klub infratuzilmasini to'laqonli shakllantirish jarayoni amalga oshirilayotganligi sababli oldindagi besh yillikdagi bajaradigan ishlarimizni reja qilganmiz. O'ylaymizki, kelajakda jamoamiz A PRO-Ligada, nasib bo'lsa Superligada ishtirok etadi, buning uchun oldinda hali ko'p ishlarimiz bor. Bizda U-18 jamoasi ham bor, Qiziltepa, Karmana, Navbahor tumanlaridan iqtidorli futbolchi yigitlarni yoshlar jamoamizga jalb etdik va sekin-sekin shakllantirib bormoqdamiz.

Hozirgi kunda jamoamiz uy o'yinlarini o'tkazadigan Qiziltepa tumanidagi "Markaziy" stadionga muxlislarni jalb etish bo'yicha tizimli ishlarni olib bormoqdamiz. SHuningdek kelajakda jamoamiz yangi zamonaviy stadionga ega bo'lishi uchun amaliy ishlarni boshlab yuborganmiz.

Bekzod Tolibov yozib oldi.