Osiyoning sovrindor jamoasi yoxud “Al Hilol” haqida

Ertaga “Paxtakor” stadionida dastlabki uchrashuv bo'lib o'tadi. Raqib jamoa haqida turli qiziqarli malumotlar bilan tanishib oling va “Hilol” to'g'risida tushunchaga ega bo'ling.

“AL HILOL” FUTBOL KLUBI
Tashkil topgan yili: 1957
Laqabi: “Boss”, “ko'k qanotlar”
Stadioni: “Qirol Fahd”, 67 ming tomoshabinga mo'ljallangan
Rahbari: Abdulrahmon Bin Musaad
Bosh murabbiyi: Sami Al Jaber
Saudiya Arabistoni chempionatida ikkinchi o'rinni egalladi.



Jamoa yutuqlari: 13 karra Saudiya Arabistoni chempioni (1977, 1979, 1985, 1986, 1988, 1990, 1996, 1998, 2002, 2005, 2008, 2010, 2011), 6 bor Saudiya Qiroli Kubogi sohibi (1961, 1964, 1980, 1982, 1984, 1989), 12 marta Saudiya SHahzoda Kubogi sohibi (1964, 1995, 2000, 2003, 2005, 2006, 2008, 2009, 2010, 2011, 2012, 2013), 8 karra Saudiya FF Kubogi egasi (1987, 1990, 1993, 1996, 2000, 2005, 2006, 2014), Osiyo klublari chempionati g'olibi (1991, 2000), Osiyo Kubok egalari kubogi g'olibi (1997, 2002), Osiyo Superkubogi sohibi (1997, 2000), Arab Ko'rfazi klublari chempionati g'olibi (1986, 1998), Arab CHempionlar ligasi g'olibi (1994, 1995).

1957 yil tashkil etilgan jamoa shu paytgacha jami 55 bor turli musobaqalarda g'oliblik nashidasini surgan. OCHLning eski formati sanalgan Osiyo klublari chempionatida ham 2 marta zafar quchgan. “Al Hilol” Osiyoning o'tgan asrdagi eng yaxshi jamoasi deb tan olingan.

Ayni paytda jamoaga Sami Al Jaber murabbiylik qilmoqda. U bilan 2 yilcha avval suhbatlashganimizda Jaber “Hilol”ning asosiy maqsadi yaqin yillarda OCHLda g'alaba qozonish ekanini takidlagandi. O'sha paytlarda u hali jamoada bosh murabbiy sifatida faoliyat yuritmasdi. O'tgan yili rahbariyat unga ishonch bildirdi. “Hilol” chempionatda ikkinchi o'rinni egalladi. Bu esa yomon natija emas.



Sami AL JABER
Tug'ilgan sanasi: 11.12.1972
Tug'ilgan joyi: Ar Riyod
Futbolchilikdagi ampluasi: hujumchi
O'ynagan jamoalari: 1988–2008 “Al Hilol” 305 (143), 2000–2001 “Vulverxempton” 4 (0).
Saudiya Arabistoni milliy terma jamoasida 156 uchrashuvda 46 to'p kiritgan.
Boshqargan jamoasi: “Al Hilol”, 2013 yildan buyon.

Guruh bosqichida “Al Ahli”, “Sepaxan” va “Al Sadd” bilan to'qnash kelgan riyoliklar 9 ochko to'plab, peshqadamga aylanishdi. Oxirgi turda “Sepaxan” 1:0 hisobida mag'lub etilgani tufayli Jaber shogirdlari nimchorak finalga chiqishdi. O'sha bellashuvni 2014 yilgi mavsum uchun eng ko'p muxlis stadionda kuzatdi – 49650 nafar. Jamoa 12 bor raqiblar darvozasini ishg'ol qildi. Nosir Al SHamrani 6 to'p kiritgan bo'lsa, Tiago Neves 3 gol urdi. SHamrani milliy chempionatda 21 to'p kiritdi. Neves hisobiga 13 gol yozildi. Ushbu futbolchilar, shuningdek, Yosir Al Qahtani, Muhammad Al SHalhub, Segundo Kastilo “Bunyodkor” himoyachilari uchun asosiy muammolarni yuzaga keltirishlariga shubha yo'q. Jamoa safida milliy terma jamoaga nomzodlar va 4 nafar legioner bor. Koreyalik Kvak Tay Xvi va braziliyalik Digao himoyada to'p tepadi. Kastilo tayanch yarim himoyachi, Neves ijodkor futbolchi vazifasini bajaradi. Bu legionerlarning barchasi yuqori saviyada o'yin ko'rsatadi. Aynan shu tarafdan ustunlik “Hilol” jamoasida deyish mumkin. Neves va SHalhub texnik imkoniyat va driblinglar orqali raqibga bemalol xavf solib, 2-3 futbolchini ortda qoldirishadi. Kastilo hamon Ekvador terma jamoasiga jalb etib kelinadi. “Bunyodkor”ning yarim himoyachilari ertangi bahsda o'ta faol ruhda o'ynashlari talab qilinadi. SHuningdek, himoyada ham ishonchli harakat qilish lozim. “Al Jaish” bilan safardagi o'yindek xatolar yuzaga kelsa, bu safar ham omad kulib boqishi tufayli muvaffaqiyatga erishishga umid qilib bo'lmaydi.

“D” guruhi
Al Hilol - Al Ahli - 2:2
Gollar: Nosir Al SHamrani 60, 74 - Ximenez 53, Grafite 58.

Sepaxan – Al Hilol - 3:2
Gollar: Bulku 18, SHarifi 72, Sukaj 90 - Kastilo 28, Neves 33.

Al Sadd – Al Hilol - 2:2
Gollar: Blushi 26, Belhaj 66 - Neves 45, 56.

Al Hilol – Al Sadd - 5:0
Gollar: Qahtani 3-pen, Sulton Deayya 28, Nosir Al SHamrani 34, 58, 62.

Al Ahli – Al Hilol - 0:0

Al Hilol - Sepaxan - 1:0
Gol: Nosir Al SHamrani 45.

#	Jamoa	O'	YU	D	M	UG - O'G	T-N	O
1	Al Hilol	6	2	3	1	12 - 7	5	9
2	Al Sadd	6	2	2	2	8 - 14	-6	8
3	Al Ahli	6	1	4	1	6 - 6	0	7
4	Sepaxon	6	2	1	3	9 - 8	1	7

“Al Hilol” bu mavsum darvozani Abdulloh Sudayriga ishonib topshirdi. Himoyada Digao, Kvak Tay Xvi, Yosir Al SHahrani va Sulton Beshi ko'proq harakat qilgan. Yarim himoyada Salim Davsari, Muhammad SHalhub, Salmon Faraj, Tiago Neves, Segundo Kastilo va Saud Xariri o'ynagan. Ulardan 4 nafarini o'yinga qarab Jaber o'zgartirib turadi. Hujumda esa Nosir SHamrani va Yosir Qahtonidan foydalanadi. Ertangi bellashuvda ham shu futbolchilar asosiy tarkibdan o'rin olsalar ajab emas.

“Al Hilol”ning OCHL uchun tarkibi
Darvozabonlar
28. Abdulloh Sudayri
30. Fayz Subaih
32. Hussayn SHayan
35. Muhammad Vakid

Himoyachilar
2. Sulton Al Beshi
4. Abdulla Zori
12. Yosir Al SHahrani
17. Abdulloh Hafiz
23. Kvak Tay Xvi (Janubiy Koreya)
26. Digao (Braziliya)
31. Muhammad Burayk
33. Sulton Duayyi
46. Ahmad SHarahili
49. Abdulloh SHameh
51. Fahad Zahim

Yarim himoyachilar
5. Abdullatif Al G'annam
7. Tiago Neves (Braziliya)
8. Abdulloh Otayf
10. Muhammad Al SHalhub
11. Abdulaziz Davsari
13. Salmon Faraj
14. Segundo Kastilo (Ekvador)
27. Saud Xariri
29. Salim Davsari
39. Abdulloh Muhammad

Hujumchilar
24. Navaf Obid
15. Nosir Al SHamrani
16. Yusuf Al Salim
20. Yosir Al Qahtani
36. Xolid Kaabi



“Al Hilol” o'z mashhurligidan unumli foydalanadi. “Mobily” kompaniyasi tuzilgan shartnoma tufayli riyodliklar har yili 18 million AQSH dollariga teng mablag'ga ega bo'lishadi. Bu jamoa liboslarida kompaniya nomi reklama qilingani uchun to'lanadigan pul. Bundan tashqari, jamoa har qanday sovrinni qo'lga kiritsa, qo'shimcha 800 ming dollarga ishlaydi. O'rtacha ushbu kompaniyadan boshqa kirimlar bilan hisoblaganda “Hilol” byudjetini 20 million dollar bilan boyitib oladi.

Klub razmlari tushirilgan libos va turli mahsulotlar sotuvidan ham katta miqdorda pul ishlab topadi. Magazin ishga tushirilishi bilan ilk haftaning o'zida tushum miqdori 266 ming dollardan iborat bo'lgan.

Televidenie bilan translyaciyalar huquqini sotish shartnomasiga Saudiya Arabistoni FF egalik qiladi. Federaciya har bir klubga 1,2 mln dollar miqdorida mablag' o'tkazib beradi. Klub xo'jayinlari esa har yili jamoa faoliyat yuritishi uchun zarur bo'lgan mablag'ni topib berishadi. Bu pul miqdori o'rtacha 40 million dollarni tashkil qiladi. CHiptalar sotilishidan tushgan 25 foiz mablag' xayriya jamg'armalariga o'tkazib beriladi.

Behzod NAZAROV tayyorladi.