Osiyo Kubogi-2015. Xitoy bilan o'yinga tayyorgarlik davom etmoqda

Bugun futbolchilarimiz Brisben shahridagi "Brisben Straykers" (1-liga havaskorlar jamoasi) uy uchrashuvlarini o'tkazadigan maydonda mashg'ulot o'tkazishdi. Mashg'ulot belgilangan vaqtdan yarim soatcha oldin boshlandi. Biz Sidneydan Brisbenga tushdan so'ng uchdik va bu erga etib kelishimiz bilanoq narsalarni darhol mehmonxonaga joylashtirib, o'zimiz mashg'ulotni ko'rgani ketdik. Xayriyat, Sidneydagidan farqli o'laroq bu erda terma jamoa mashg'ulot o'tkazgan maydon biz turgan mehmonxonadan ko'p uzoq emas ekan.



SHaharda kun bo'yi yomg'ir yoqqani tufayli maydon jiqqa ho'l holatga kelib qolgan ekan. Mashg'ulot odatdagidek engil chigalyozdi mashqlari bilan boshlandi. Buni yordamchi murabbiy Aleksandr Volkov o'tkazdi. SHundan so'ng navbat to'p bilan ishlashga etib keldi va bosh murabbiy Mirjalol Qosimovga yordamchilari - Baxtiyor Ashurmatov va SHuhrat Maqsudov yordam berishdi. Darvozabonlarni esa har doimgidek Pyotr Gizimchuk shug'ullantirdi. Mashg'ulotning asosiy qismi tarkibni ikkiga bo'lib olib borildi. Bunda asosiy tarkib bilan Mirjalol Qosimovning o'zi ishladi.



Server Jeparov, Timur Kapadze, Bahodir Nasimov, Vohid SHodiev, Odil Ahmedov, Jasur Hasanov, Aziz Haydarov, Sardor Rashidov, Jamshid Iskanderov, Igor Sergeev, Anzur Ismoilov kabi futbolchilar asosiy tarkib azosi sifatida mashg'ulot o'tkazishdi. Boshqa o'yinchilar bilan SHuhrat Maqsudov ishladi.



Darvoqe, terma jamoamizning bugungi mashg'ulotini ko'rish uchun xitoylik uch nafar jurnalist ham keldi. Ular terma jamoamiz haqida malumot olishga harakat qilishdi. Xitoylik bir hamkasbimizning aytishicha, Osiyo chempionatini yoritish uchun Avstraliyaga 150 nafarga yaqin OAV xodimlari kelgan, shuningdek, O'zbekiston - Xitoy bahsini 5 ming nafar xitoylik ishqiboz kuzatishi kutilmoqda.


Xayrulla Xoliqov
Brisben