Oliy liganing eng yosh gol muallifi yilning eng yaxshilarini aytdi

Yakuniga etgan mavsumda Rashidxonov raqib darvozasini ishg'ol qilgan eng yosh futbolchiga aylangandi. U oliy liganing 8-turidan o'rin olgan “Nasaf” - “Qizilqum” uchrashuvida o'z nomini tabloga yozdirib qo'ygan edi.

Bu uning oliy ligadagi ilk goli edi. Yakunda o'sha gol Namangan futbol maktabi tarbiyalanuvchisiga oliy ligada raqib darvozasiga yo'l topa olgan eng yosh gol muallifi maqomini olib bergandi. “Qizilqum” darvozasini ishg'ol qilgan kuni Islom 18 yoshu 198 kunlik edi.

Albatta, bu Islomning shaxsiy tanlovi. SHu bois, Rashidxonovning tanlovini hurmat qilishingizni so'raymiz.

- Islom, yil so'nggida eng yaxshi murabbiy va futbolchilarni aniqlash odat tusiga kirgan. Bu borada shaxsiy tanlovingiz qanday? Har ikki yo'nalishda o'z ovozingizni kimlarga bergan bo'lar edingiz?

- Murabbiylar nominaciyasida birinchi o'rinni Ro'ziqul Saydullaevichga beraman. Ikkinchi o'ringa “Bunyodkor” bosh murabbiyi Sergey Lushanni munosib, deb o'ylayman. “Buxoro” jamoasi murabbiyi Jamshid Saidovni uchinchi o'rinda ko'rishni istardim.

- Futbolchilardan-chi?

- Ikkinchi davrada jamoamiz safiga kelib qo'shilgan Dragan CHeranni mavsumning eng yaxshi futbolchisi deb bilaman. Kuchli uchlikda jamoadoshim Bahrom Abdurahimov hamda “Bunyodkor” hujumkor yarim himoyachisi Eldor SHomurodovga ovoz berardim.

Kamoliddin ALIMOV suhbatlashdi