Oliy liga. 8-tur ramziy terma jamoasi

Darvozaga "Olmaliq" klubi posboni Xurshid Xodjaevni loyiq deb topdik. Ushbu posbon Farg'onada "Neftchi" bilan uchrashuvda o'zidan yaxshi taassurot qoldirdi. Uning darvozasiga raqiblar faqat bir marta, penaltidan gol ura olishdi xolos. Xodjaev bundan tashqari o'tgan turlarda o'z darvozasidan gol o'tkazmagandi.

"Buxoro" sardori Vladimir Baenko "Metallurg" bilan uchrashuvda faol o'ynadi. "Buxoro" Bekoboddan g'alaba bilan qaytishidan aynan Baenkoning xissasi juda katta bo'ldi.

"Qizilqum" o'z maydonida "Nasaf" bilan 1:1 hisobida durang o'ynadi. SHu kuni mezbonlar safida Fayzullo Qambarov himoyada mustahkam turdi. Qarshiliklar faqat penaltidan gol urishdi.

"Olmaliq"ning yana bir futbolchisi "Neftchi"ga qarshi bahsni yaxshi o'tkazdi. Farg'onalik hujumchilarga o'yin bermagan SHavkat Mullajonov uchinchi bor ramziy terma jamoamizdan o'rin oldi.

"Qo'qon-1912" G'uzorda shiddatli bahsda 3:2 hisobida g'alabaga erishib qaytdi. Bu uchrashuvda qo'qonliklar yarim himoyachisi Javohir Sidiqov juda faol o'ynadi. Bundan tashqari Sidiqov gol urishga ham muvaffaq bo'ldi. 

"Mashal" sardori Zafar To'raev doimgidek jamoasi joniga oro kirishda davom etadi. "Bunyodkor"ga qarshi o'yinda muboraklilar safida g'alaba to'pini aynan To'raev Zuhurov qo'riqlayotgan darvozaga kiritdi.

"Lokomotiv" Toshkent derbisida "Obod"ni sharmandali hisobda taslim qildi - 7:0. SHu kuni "temiryo'lchilar" safida ko'plab futbolchilar yaxshi o'ynashdi. Ular orasida Jaloliddin Masharipov qolganlardan ajralib turdi, bundan tashqari u ikki bor raqib darvozasini ishg'ol qilishga erishdi.

"So'g'diyona" Samarqandda "Dinamo" bilan jangovor durang o'ynab qaytdi. Jizzax klubi safida yarim himoyachi Sardor Eminov juda ham faol o'ynadi. U gol urmagan bo'lsa ham jamoasining safardan durang bilan qaytishiga katta xissa qo'shdi.

"Neftchi"ning yosh yarim himoyachi Abdurahmon Abdulhaqov o'tgan turdayoq ramziyga kirishga loyiq bo'lgandi. Ammo raqobat tufayli tarkibimizdan chetda qolgandi. 8-turda "Olmaliq" bilan o'yinda faol harakatlari bilan ajralib turgan Abdurahmon jamoasini mag'lubiyatdan qutqargan penaltini ishlab berdi.

"Lokomotiv"ning yirik g'alaba qozonishida Murod Bobojonov katta rol o'ynadi. "Neftchi"dan ijaraga olishgan hujumchi "Obod" darvozasiga ikkita gol urdi va Ikrom Aliboevga golli pas oshirdi. SHu bois hujumchi haqli ravishda ramziy termadan o'rin oldi.

"Dinamo" hujumchisi Amirjon Safarov oliy ligada ilk bor dublga erishdi. "So'g'diyona" bilan bahsda Safarov ikkinchi bo'lim boshida zaxiradan maydonga tushib o'z hisobiga ikkita gol yozib qo'yishga erishdi.

Championat.asia talqiniga ko'ra oliy liganing 8-turi ramziy terma jamoasi

Darvozabon
Xurshid Xodjaev ("Olmaliq")

Himoyachilar
Vladimir Baenko ("Buxoro") (2-marta ramziy terma jamoada)
Fayzullo Qambarov ("Qizilqum")
SHavkat Mullajonov ("Olmaliq") (3)

Yarim himoyachilar
Javohir Sidiqov ("Qo'qon-1912")
Zafar To'raev ("Mashal") (2)
Jaloliddin Masharipov ("Lokomotiv")
Sardor Eminov ("So'g'diyona")
Abdurahmon Abdulhaqov ("Neftchi")

Hujumchilar
Murod Bobojonov ("Lokomotiv")
Amirjon Safarov ("Dinamo")