Olimpiya terma jamoamizga nomzodlar

Hozircha Xitoyga yo'l oladigan tarkib malum emas. Bosh murabbiy ro'yxatni katta ehtimol bilan oliy liganing 12-turidan so'ng malum qiladi. Yana shuni aytishimiz lozim, Maqsudov o'zi bilan 1993-94 yilda tug'ilgan futbolchilarni olib ketadi.

SHunday bo'lsa-da, biz bu yoshdagi terma jamoaga chaqirilishi mumkin bo'lgan futbolchilarni keltirib o'tamiz. SHu narsa aniqki, SHuhrat Maqsudov Xitoyga 23 nafar futbolchini olib ketadi. Oliy liga klublarida O'zbekiston olimpiya terma jamoasiga nomzod o'yinchilar ko'p. Faqat hamma gap termaga jamoaga kelgandan keyin futbolchining qanchalik o'zini ko'rsata olishida. Quyida nomzod o'yinchilarni keltirib o'tamiz.
 
BUNYODKOR
Sardor Sobirxo'jaev
Temur Ayupov

“Bunyodkor”dan ikki nafar nomzod bor - Sardor Sobirxo'jaev bilan Temur Ayupov. Ayupov oxirgi ikki turda yaxshi o'yin ko'rsatdi va ikkita gol urdi. Sobirxo'jaevga kelsak, u doim ham bir tekis o'yin ko'rsata olmayapti. SHu bois oliy liga bahslarida bazan tushyapti, bazan zaxirada qolib ketmoqda.

LOKOMOTIV
Bobur Yo'ldoshev
Sardor Rahmonov
Quvondiq Ro'ziev

“Lokomotiv”dan esa uch nafar nomzod bor. Himoyachi Bobur Yo'ldoshev jamoaning allaqachon asosiy o'yinchisiga aylanib bo'ldi. U himoya markazida bir tekis harakat qilmoqda. Sardor Rahmonov ko'pincha zaxiradan maydonga tushib turibdi va u ham istedodli futbolchi hisoblanadi. Quvondiq Ro'zievni Toshkentda “Qizilqum” bilan kechgan bahsda ko'rdik. Unda tajriba ancha kamligi ko'rinib qoldi.

NASAF
Buni qarangki, “Nasaf”dan olimpiya terma jamoamizga hech bir nomzod yo'q. Qashqadaryoning birinchi raqamli jamoasidan olimpiya terma jamoasiga hech kimning chaqirilmasligi ajablanarli hol, albatta.

PAXTAKOR
Akmal Tursunboev
Muhsin Ubaydullaev
Jamshid Iskanderov
Vladimir Kozak
Jaloliddin Masharipov
Abbos Maxsitaliev
Igor Sergeev
Abdulaziz Yusupov
Timur Hakimov

“Paxtakorga” yana bir bor qoyil qolsak arziydi. Klub o'z tanlagan yo'lidan og'ishmay olg'a bosishda davom etmoqda. Hisoblab ko'rsak, “Paxtakor”dan olimpiya jamoamizga nomzod naqd to'qqiz nafar futbolchi bor ekan. Katta ehtimol bilan Akmal Tursunboev termaning asosiy posboni bo'ladi. SHuningdek, Iskanderov, Kozak, Sergeev kabi futbolchilar ham asosiy o'yinchilar hisoblanishadi. SHuningdek, boshqa futbolchilar ham istalgan vaqtda zaxiradan tushib jamoa o'yinini kuchaytirishi mumkin.
 
OLMALIQ
Diyor Turopov

Diyor Turopov o'tgan bir yil ichida ancha ko'zga tashlanib qoldi. U klubi safida ham tez-tez maydonga tushib turibdi. Diyorjon hatto milliy terma jamoamizga ham chaqirildi. U ham katta ehtimol bilan Xitoyga boradi.
 
BUXORO
Firdavs Asadov
Aziz Murotov

“Buxoro”ning tezkor futbolchisi Firdavs Asadov bu yil faol harakat qilmoqda. Uni bir necha bor klub ustozi Edgar Gess ham maqtab o'tdi. Aziz Murotov esa negadir ko'rinmay qoldi. Bu yigit Toshkentda o'tkazilgan o'smirlar o'rtasidagi Osiyo chempionatida porlagandi. Lekin keyinchalik uning o'yinida pasayish yuzaga keldi chog'i, oliy ligada kam maydonga tushadigan bo'lib qoldi.
 
METALLURG
Asiljon Mansurov
SHohnazar Norbekov

SHohnazar Norbekov “Metallurg”ning o'ng qanot yarim himoyasida yaxshi o'yin ko'rsatib kelyapti. U shuningdek, hujumda ham o'ynay oladi. Bu futbolchining ham Xitoyga yo'l olishi kutilmoqda. Ammo Asiljon Mansurov anchadan beri ko'rinmay qoldi.

DINAMO
Jasur Azimov
Islom Hamidov
Abdulla Nabiev
Komil SHarofutdinov

Samarqandning “Dinamo” jamoasida Jasur Azimov, Islom Hamidov, Abdulla Nabiev, Komil SHarofutdinov kabi futbolchilar bor va ular ham olimpiya terma jamoasiga nomzod hisoblanishadi. Muxlislar Nabiev bilan SHarofutdinovni har holda yaqindan tanishadi. Azimov bilan Hamidov esa endi-endi tanilib kelishyapti.

NEFTCHI
Abdumavlon Abdujalilov
Maksimilian Fomin
Abdulloh Olimov
Murod Bobojonov

“Neftchi”dan ham to'rt nafar nomzod bor. To'g'ri, Maksimilian Fomin bilan Abdulloh Olimov “Paxtakor”dan ijaraga olingan o'yinchilar. Lekin bu ikki futbolchi hozirda “Neftchi” sharafini himoya qilmoqda. Murod Bobojonov o'tgan turda o'zini ko'rsatdi. U “Bunyodkor” darvozasiga to'p kiritishni uddalay oldi.

SO'G'DIYONA
Sanjar Rashidov
Maruf To'raev
Jasur Hakimov

“So'g'diyona”da Sanjar Rashidov, Maruf To'raev, Jasur Hakimov singari futbolchilar to'p tepmoqda va ular ham olimpiya terma jamoamizga nomzod hisoblanadi. Jasur Hakimov anchadan beri o'smirlar va yoshlar terma jamoasida o'ynab keldi. Mana endi olimpiya termasiga taklif etiladigan bo'lsa, yana o'zini ko'rsatishi kerak bo'ladi.

NAVBAHOR
Tohir SHamsiddinov

Aslida “Paxtakor”ga tegishli Tohir SHamsiddinov hozir faoliyatini “Navbahor”da davom ettirmoqda. U o'ng qanot himoyachisi hisoblanadi. U ham bir tekis o'yin ko'rsatib kelmoqda va Maqsudov uni ham Xitoyga olib ketsa kerak.

QIZILQUM
Buni qarangki, “Qizilqum”dan ham bamisoli “Nasaf”da bo'lgani olimpiya terma jamoamizga birorta nomzod futbolchi yo'q ekan. Balki bordir, lekin “Qizilqum” tarkibiga qaraydigan bo'lsak, oliy ligada shu yoshdagi futbolchi ko'zga tashlanmayapti.

MASH'AL
Javohir Ilyosov
Iskandar SHoyqulov
Yunus Ochildiev
Jahongir Abdumo'minov
Xolmurod Xolmurodov
Ixtiyor Toshpo'latov

“Mashal”da ham olimpiya terma jamoamizga nomzodlar etarlicha. Bazi sabablarga ko'ra, Jahongir Abdumo'minov bilan Ixtiyor Toshpo'latov o'tgan yilgi yoshlar o'rtasidagi jahon birinchiligida qatnasha olishmadi. Lekin bu ikki futbolchi harakat qiladigan bo'lsa, olimpiya termamizdan chaqiruv olishi mumkin. SHuningdek, Xolmurodov, Ochildiev, Ilyosov singari o'yinchilar ham bor.

ANDIJON
Sergey Smorodin

“Andijon”dan birgina Sergey Smorodin bor. Terma jamoamiz ustozi SHuhrat Maqsudov bu o'yinchini ham chaqirishi mumkin.

X.Xoliqov.