Oliy ligada bugun va erta 7-tur. Bu safar gol urasizmi?

Ertaga esa qolgan oltita o'yin o'tkaziladi. Oliy liganing har bir turi oldidan va undan keyin qaysi klubda kimlar gol urganiga alohida etibor berib kelyapmiz. Bunda nigohimiz eng avval hujumchilarga qaratilmoqda, chunki ulardan talab qilanadigani gol urish.

7-tur oldidan oliy ligada to'p kiritmagan hujumchilar soni 20ta qoldi. Mavsum boshida ular 30 nafardan ko'p edi va hozirga kelib bazi hujumchilar to'p kiritishdi. Xususan, o'tgan turda SHahboz Erkinov, Abdumalik Abdullaev, Ilyos Qurbonov, Igor Sergeev kabi hujumchilar har tugul gollar seriyasini ochib olishdi. Endi navbat boshqalarga kelgan bo'lsa ajab emas.

Quyida dastlabki olti tur yakunlariga ko'ra oliy ligada hali to'p kirita olmagan hujumchilarga to'xtalib o'tamiz. Boshqa klublarda har qalay hujumchi degani gol urib turibdi, ammo “Neftchi”dan negadir hech bir hujumchi shu paytgacha to'p kirita olmadi. Vaholanki, nomlarni eshitsangiz “qo'rqib” ketasiz: Nosir Otaqo'ziev, Zohid Abdullaev, Ro'zimboy Ahmedov, Otabek Isroilov. Keling, yaxshisi to'p kirita olmayotgan hujumchilarga birma-bir to'xtalsak.



#24. Bahodir Pardaev (“Bunyodkor”)
Ko'rsatkichi: 4 o'yin, 106 daqiqa
Pardaev ko'pincha hujumchi ortida harakat qilmoqda. U o'yin paytida to'pni oldindagilarga etkazib berish bilan ovora. Lekin o'zi jarima maydonchasiga yorib kirib, raqib darvozasi tomon xavf solganini hali ko'rmadik. Aslida Bahodirga ikkinchi hujumchi bo'lib o'ynash yarashadi, lekin gol ham urib turish kerak-da.

#11. Aleksandr SHadrin (“Lokomotiv”)
Ko'rsatkichi: 2 o'yin, 63 daqiqa
SHadrin boshqa jamoada bo'lganida allaqachon asosiy tarkibda to'p surayotgan bo'lardi. Lekin Nagaev bilan Farhod Tojievni raqobatda yutish qiyin. Qolaversa, har ikki hujumchi ham gol urishni uddaladi. Ammo hozircha SHadrinning omadi kelgani yo'q.

#19. Igor Taran (“Nasaf”)
Hali maydonga tushmadi
Igor Taran jarohati sabab hozircha maydonga tushgani yo'q. SHu bois uni tanqid qilishga haqli emasmiz. Taran oldin davolanib safga qaytsin, bir-ikkita o'yinda ishtirok etsin, keyin bu futbolchiga to'xtalamiz.

#41. Azamat Allaniyazov (“Nasaf”)
Ko'rsatkichi: 4 o'yin, 254 daqiqa
Azamat Allaniyazov 4ta uchrashuvda to'p tepishga ulgurdi, lekin hozircha goldan darak yo'q. O'tgan yil bu hujumchi gol urib turardi. Bu yil esa nimadir bo'lgan shekilli. Azamat balki keyingi o'yinlarda to'p kiritishni uddalar.

#9. Zafar Polvonov (“Olmaliq”)
Ko'rsatkichi: 6 o'yin, 383 daqiqa
Zafar Polvonov ham tez-tez tanqid qilinmoqda. Igor SHkvirin har doim undan gol kutayotganini aytadi, lekin hujumchining o'zi jim. Polvonov tez orada gol urib murabbiyning ishonchini qaytarib olishi lozim, aks holda...

#70. Farrux SHotursunov (“Dinamo”)
Ko'rsatkichi: 1 o'yin, 90 daqiqa
SHotursunov bitta o'yinda ishtirok etdi va to'liq o'ynadi. Keyin esa jarohat olib shundan beri ko'rinmay qoldi. U ham hozircha davolanish bilan band.



#11. Nosir Otaqo'ziev (“Neftchi”)
Ko'rsatkichi: 3 o'yin, 375 daqiqa
Otaqo'zievga ortiqcha tarif shart emas. Nosir imkon bo'ldi deguncha gol uradigan hujumchilar xilidan. Uning tajribasiga shubha yo'q. Ammo negadir “Neftchi”da omadi kelmayapti. Muxlislar esa Nosirdan gol kutishda davom etmoqda.  

#22. Ro'zimboy Ahmedov (“Neftchi”)
Ko'rsatkichi: 5 o'yin, 271 daqiqa
Ro'zimboy ko'proq orqa planda harakatlanadigan futbolchi. U shu paytgacha beshta o'yinda maydonga tushdi. Ammo haliyam to'p kirita olmadi.

#11. Otabek Isroilov (“Neftchi”)
Ko'rsatkichi: 2 o'yin, 84 daqiqa
O'z vaqtida yoshlar va olimpiya terma jamoamizga chaqirilgan Otabek Isroilov ham bu yil nima uchundir sust harakat qilyapti. Unga bir gal hatto “Bunyodkor” ham qiziqqandi. Agar Otabek o'z ustida jiddiy ishlamasa, “Neftchi”dagi o'rnini yo'qotib qo'yishi mumkin.

#15. Zohid Abdullaev (“Neftchi”)
Ko'rsatkichi: 4 o'yin, 148 daqiqa
Umuman olganda, “Neftchi”da birortayam hujumchi gol kirita olgani yo'q. Zohid Abdullaev ham shular jumlasidan. Zohid “Metallurg”da ekanligida har tugul gollar urib turardi. Farg'onaga kelganidan beri hozircha jim yuribdi.

#21. Akmal Abdurahmonov (“So'g'diyona”)
Ko'rsatkichi: 4 o'yin, 100 daqiqa
Akmal Abdurahmonov o'tkir hujumchi emas, bitta vaziyatdan bittaga foydalanishi qiyin. Akmal oliy ligada o'zini ko'rsatishi uchun ancha ishlashi kerak.

#17. Sohib Abdullaev (“Navbahor”)
Hali maydonga tushmadi
Sohib Abdullaev yosh umidli futbolchilardan biri hisoblanadi. Ammo negadir hech omadi kelmayapti. U “Mashal”da ekanligida bir yil yoshlar ligasi to'purari bo'lgandi. Oliy ligada esa gol urish tugul, hatto maydonga tushgani yo'q.

#10. Vladimir SHishelov (“Qizilqum”)
Ko'rsatkichi: 5 o'yin, 383 daqiqa
“Qizilqum” yaxshi o'yin ko'rsatayotgani bilan SHishelovdan hozirsa sas-sado yo'q. Tajribali hujumchi qachon gol urishini vaqt ko'rsatadi.

#11. Alisher Xoliqov (“Qizilqum”)
Ko'rsatkichi: 4 o'yin, 63 daqiqa
Mavsum-2010 to'purarligini qo'lga kiritgan Alisher Xoliqov bu yil o'zini ko'rsata olmayapti. U hozircha to'rtta uchrashuvda maydonga tushib, birortayam to'p kirita olmadi.

#80. Mo'ydin Mamazulunov (“Mashal”)
Ko'rsatkichi: 6 o'yin, 364 daqiqa
“Mashal” yaxshi niyatlar bilan Mamazulunovni o'z safiga qo'shib oldi. Biroq bu hujumchi o'zini ko'rsata olmayapti. Mo'ydin yaqinda matbuotga intervyu berib, gol urmayotganidan xafa ekanligini aytdi. Xursand bo'lishi uchun esa to'p kiritmasa bo'lmaydi.

#11. Bahodir Murtazoev (“Mashal”)
Ko'rsatkichi: 2 o'yin, 42 daqiqa
“Mashal” murabbiylari kasbilik hujumchi Bahodir Murtazoevga juda kam imkoniyat berishmoqda. U atigi ikkita bellashuvda ishtirok etdi xolos. Murtazoev birinchi ligada o'zini ko'rsata olgandi, lekin oliy ligada to'p kirita olmayapti.



#9. Ixtiyor Toshpo'latov (“Mashal”)
Ko'rsatkichi: 6 o'yin, 182 daqiqa
Ixtiyor Toshpo'latov bazan hujumda, bazan qanotlarda harakat qiladi. Umuman olganda, universal futbolchi. Lekin ko'pchilik Ixtiyorni hujumchi sifatida biladi, undan gollar kutishadi. Toshpo'latov gol urmas ekan, olimpiya terma jamoamizdan o'rin olishi qiyin.   

#11. SHuhrat Mirxoldirshoev (“Andijon”)
Hali maydonga tushmadi
“Andijon”ning tajribali hujumchisi SHuhrat Mirxoldirshoev ham hozircha maydonga tushgani yo'q. SHu bois bu hujumchi haqida hech narsa deya olmaymiz.  

#9. Lochin Soliev (“Andijon”)
Ko'rsatkichi: 1 o'yin, 34 daqiqa
Lochin Soliev o'tgan yil boshqa klubga ketmoqchi edi, lekin oxirida baribir “Andijon”da qoldi. Bu hujumchi ham o'tgan mavsum birinchi ligada o'zini ko'rsatgandi, lekin oliy liga ancha kuchli ekanligini inobatga olsak, Lochin Solievning nihoyatda mashaqqatli mehnat qilishi kerak bo'ladi.

#88. Alisher Azizov (“Andijon”)
Ko'rsatkichi: 6 o'yin, 348 daqiqa
Alisher Azizov yaxshi saviyadagi hujumchi. Biroq u ham o'zini ko'rsata olmayapti. Vaholanki, bosh murabbiy Azamat Abduraimov unga etarlicha imkoniyat bermoqda. Endi buyog'i Alisherning o'ziga bog'liq.

X.Xoliqov tayyorladi.