Oliy liga. 16-turda eng ko'p muxlis Navoiyda yig'ildi!

Afsuski yildan yilga saviyasi pasayib borayotgan oliy ligamizning o'yinlari ishqibozlar uchun avvalgidek qiziqarli tuyulmayotgandek nazarimizda.

Ortda qolgan 16-turning barcha o'yinlariga umumiy aytganda 42384 nafar tomoshabin tashrif buyurgan. Har bir bahsga o'rtacha 6000 ishqiboz kirgan demakdir. 

Eng ko'p muxlis Navoiyda kechgan “Qizilqum” – “Paxtakor” uchrashuviga kirgan. Mezbonlar garchi ikkinchi davraning dastlabki ikki o'yinida mag'lubiyatga uchragan bo'lsa-da, shunga qaramay 16-turda eng ko'p muxlis yig'a oldi. Bizningcha bunga sabab raqib “Paxtakor” jamoasi bo'lgani uchun ko'p tomoshabin tashrif buyurgan.

Turning markaziy o'yinlaridan biri sifatida qaralgan “Neftchi” – “Navbahor” bahsi Farg'onadagi “Kirguli SK” stadionida emas balki Qo'qonda o'tkazildi. Bilishimizcha bunga sabab sifatida aynan muxlislarning tashrifi ko'rsatilgan. CHunki vodiy jamoalarining to'qnashuvi azaldan ishqibozlar bilan gavjum bo'lgan. Jamoalarning turnir jadvalida qaysi o'rinni egallab turishidan qatiy nazar, tomoshabinlar sig'imi katta bo'lgan. Bu safargi to'qanushvda ham shunday xolat bo'lishi kutilgandi. Biroq uchrashuv qaydnomasida markaziy o'yinga 9201ta tomoshabin tashrif buyurgani yozib ko'rsatilgan. Albatta buni kam deya olamiz. Yaxshi bilamizki ilgari vodiy jamoalari to'qnash kelganida kamida 20000 muxlis kirardi. Juma kuni bo'lib o'tgan o'yinga mahalliy qo'qonlik muxlislardan tashqari Farg'ona va Namangandan ham ishqibozlar tashrif buyurgan bo'lsada, stadion to'lib toshmagan.    

“Dinamo”ning qator mag'lubiyatlari samarqandlik futbol ishqibozlarini ranjitmasdan qolmayapti. Ilgari muxlislar tashrifi borasida etakchilar qatoridan o'rin egallab kelgan “Dinamo” hozirda bu borada maqtana olmaydi. 

Toshkentning “Lokomotiv” klubi garchi turnir jadvalida peshqadamlik qilayotgan bo'lsada, bu jamoa hali o'z muxlislarini topib olmadi. CHempionatimizda eng kuchli tarkibga ega bo'lgan “temiryo'lchilar” uydan ko'ra, ko'proq safarda muxlislar borasida yaxshi natija qayd etadi desak mubolag'a bo'lmaydi.  

Oliy liga, 16-tur. Kimda qancha muxlis? 

Qizilqum – Paxtakor – 1:4. 9560 tomoshabin.

Neftchi – Navbahor – 1:0. 9201 tomoshabin.

Olmaliq – Bunyodkor – 1:2. 6021 tomoshabin.

Buxoro – Nasaf – 0:2. 5731 tomoshabin.

Dinamo – So'g'diyona – 0:1. 5300 tomoshabin.

Mashal – Andijon – 6:1. 4751 tomoshabin.

Lokomotiv – Metallurg – 5:1. 1820 tomoshabin.