Oleg Zoteev: "Ilk davrani birinchi o'rinda yakunlaganimizdan mamnunman"

Mazkur yig'in “temiryo'lchilar” uchun Oliy Liga ikkinchi davrasiga tayyorgarlik vazifasini o'tab beradi.

“Lokomotiv”ning birinchi davra yakunlari hamda ikkinchi davraga olib borayotgan tayyorgarligi xususida jamoamiz yarim himoyachisi Oleg Zoteevning fikrlari bilan qiziqdik.

– Oleg, Minsk yig'ini qay tariqa o'tmoqda?
– Yig'in juda ajoyib tarzda o'tmoqda.  Ob-havoning qulayligi sabab turli xil yuklamar olishda hamda nazorat uchrashuvlarida har xil yangicha uslublarni qo'llashda muammoga duch kelmayapmiz.

– “Lokomotiv”ning birinchi davrada qayd etgan natijasi xususida nimalar deya olasiz?
– Oliy Liga ilk davrasini musobaqa jadvali peshqadami sifatida yakunlay olganimizdan juda xursandman.  Lekin bundada yaxshiroq natija qayd etishimiz va bazi o'yinlarda kutilmaganda ochko yo'qotmasligimiz ham mumkin edi.  Qolaversa,  Osiyo CHempionlar Ligasida ham guruhdan chiqish nasib etmadi.  Bunga esa jamoamizda jarohat olganlar soni ortib ketgani sabab bo'ldi.

– O'zingiz namoyish etayotgan o'yindan ko'ngilngiz to'lyaptimi?
– Ha,  shunday desa ham bo'ladi.  Ammo o'z o'yinimdan yuz foizga qoniqayotganim yo'q.  Zero bazi uchrashuvlarda biroz o'yin qovushmay qoldi.  Lekin shunday bo'lsa-da,  aksariyat bahslarda o'z o'yinimdan o'zim roxat olgan vaziyatlar soni ham kam bo'lmadi.

– Birinchi davrada sizni turli poziciyalarda o'ynaganingizga guvoh bo'ldik.  Sizga aslida qaysi nuqtada o'ynash qulayroq?
– Menga qaysi poziciyada o'ynashning unchalik ahamiyati yo'q:  Asosiysi – jamoamga naf keltirsam bas.  Lekin o'zim chap qanotda o'ynasam,  biroz qulaylikni his etishim ham rost.  Sababi mana uch mavsumdirki,  ayni shu chiziqda o'ynab kelyapman.