OK-2015 guruh bosqichidagi raqiblar bir qator o'rtoqlik o'yinlarini o'tkazishdi

Alen Perren bosh murabbiyligidagi Xitoy terma jamoasi 10 va 14 oktyabr kunlari ikkita o'rtoqlik uchrashuvida maydonga tushdi. Dastlab, 10 oktyabr kuni Xitoy terma jamoasi Pekin shahrida Tailand terma jamoasini qabul qilib 3:0 hisobida g'alaba qozondi. 14 oktyabr kuni esa, Xitoy o'z maydonida Paragvay terma jamoasini qabul qildi va qiziqarli kechgan uchrashuv bu safar ham Xitoy terma jamoasining 2:1 hisobidagi g'alabasi bilan yakunlandi.

Saudiya Arabistoni terma jamoasi ham 10 va 14 oktyabr kunlari o'z maydonida ikkita o'rtoqlik uchrashuvini o'tkazdi. Dastlab, Xuan Ramon Lopes bosh murabbiyligidagi Saudiya Arabistoni termasi 10 oktyabr kuni Ar Riyodda Urugvay terma jamoasiga qarshi maydonga tushdi va 1:1 hisobida durang o'ynadi. Kecha esa, saudiyaliklar o'z maydonida Livan terma jamoasiga qarshi o'rtoqlik uchrashuvini o'tkazishdi va ushbu uchrashuv ham 1:1 hisobida durang bilan yakunlandi.

OK-2015 guruh bosqichidagi yana bir raqib, KXDR terma jamoasi esa, avvalroq xabar berganimizdek noyabr oyida xalqaro turnirda ishtirok etadi.

Eslatib o'tamiz, Mirjalol Qosimov bosh murabbiyligidagi O'zbekiston milliy terma jamoasi ham oktyabr oyida 3ta o'rtoqlik uchrashuvini o'tkazdi. 6 oktyabr kuni Doxada Qatarga qarshi maydonga tushgan milliy terma jamoa 0:3 hisobida mag'lubiyatga uchragan bo'lsa, 10 oktyabr kuni Dubayda Bahraynga qarshi uchrashuvda 0:0 hisobida durang o'ynadi. BAA yig'ini doirasidagi so'nggi o'rtoqlik o'yinida esa, 14 oktyabr kuni Abu Dabida BAA 4:0 hisobida mag'lubiyatga uchratildi.