Og'ir damlarda birlashadigan payt keldi yoxud dushman klublar do'stga aylanmoqda

Ko'plab davlatlardagi karantin holati qancha davom etadi, qachon tugaydi, buni Yaratganda boshqa hech kim bilmaydi. SHunday bo'ldiki, koronavirus sabab hayot birdaniga o'zgarib qoldi. Endilikda hamma ushbu ko'rinmas ajalga qarshi birdamlikda jips bo'lib kurashishga harakat qilyapti. 

Misrning ikki buyuk klubi "Zamalek" va "Al Ahli" bir-biriga ashaddiy raqiblar hisoblanadi. Ispaniyada "Real" va "Barsa" qanchalik "dushman" bo'lsa, bu jamoalar ham shunday. Lekin mana shunday og'ir va sinovli damlarda Qohiraning ikki klubi birlashib kurashishga qaror qilishdi. 

Xususan "Al Ahli" himoyachisi Saad Samir #good_challenge xeshtegi bilan xayrli ishga qo'l urib, toki mamlakat bu ofatdan qutilmaguncha 20ta oilani o'z qaramog'iga oldi. Yani futbolchi ushbu oilalarni mamlakatdagi karantin holati tugaguniga qadar o'z hisobidan bilan qo'shimcha taminlab turadi. 

Oradan ko'p o'tmay ushbu chellenjga boshqa futbolchilar ham qo'shildi. Tarek Xamed, Ahmed Fathi, Muhammad El SHenavi, Mahmud Kahraba, Amir El Solia, Vael Gomaa, SHerif Ekrami, SHikabala, Ahmed Xegazi, Trezege va Ahmad Hassan shular jumlasidan. Yani bu futbolchilar o'z qaramog'iga boshqa kambag'al oilalarni olishdi. 

Yuqorida nomi keltirilgan futbolchilar "Zamalek" va "Al Ahli"ning etakchilari hisoblanadi hamda bu o'yinchilarning muxlislari ko'p. Quvonarlisi shundaki, bu ikki jamoa chellenjni alohida emas, balki birgalikda olib boryapti. Buni esa Misr futbol jamoatchiligi shunday izohladi: kecha dushman edilar, bugun esa do'st. Og'ir damlarda birlashadigan payt keldi.