OFK so'rov o'tkazdi. Kutilganidek Eron klubi g'olib chiqdi

Mana shunday so'rovnomalardan biri Osiyoning eng eng mashhur klubini aniqlash haqida bo'ldi va bunda kutilganidek Eron klubi birinchi o'rinni egalladi. Bu tushunarli, chunki eronliklar OFK o'tkazadigan so'rovlarda juda faol ekanligini hammamiz bilamiz. Agar Tehronning ikki buyuk klubidan biri "Istiqlol" yoki "Persepolis" eng mashhur klub deb topilganida ham etiroz unchalik bo'lmasdi, ammo chempionlikka ko'p ham davogarlik qilmaydigan o'rtamiyona "Traktorsozi"ning g'olib bo'lishi juda g'alati ko'rinadi. 

So'rovda ishtirok etgan klublar orasida "Traktorsozi" 51,14 foiz ovoz bilan birinchi bo'ldi va bu jamoa uchun 1,468,693 muxlis ovoz bergan. SHarq mintaqasida eng mashhur deb Xitoyning "SHanxay SHenxua" klubi topildi. Lekin bu jamoa ham na milliy chempionat, na Osiyo chempionlar ligasida nimanidir qoyillatganini eslash qiyin. 

Bunday olib qarasa, so'rovnomadagi klublarni ko'rib hayratdan yoqa ushlaysan. Osiyoning eng mashhur klubi deganda biz "Al Hilol", "Al Ittihod", "Al Ayn", "Gungju Evergrand", "Urava Reds" kabi nomlarni aytishga o'rganib qolganmiz. Lekin muxlislar nazdida mashhur jamoalar "Al Vihdat", "Johor Darul Tazim", "Persiya Jakarta" kabilar ekan.