O'FA terma jamoalar bo'limi sobiq rahbari: "Argentina o'yinlarda ishtirok etishdan bosh tortdi, biz esa Urugvay bilan kelishuvga erishdik"

"O'rtoqlik o'yinlari bir oy oldin emas, balki ancha oldin tasdiqlanadi, shuning uchun oktyabr oyining birinchi sanasida hali raqib topa olmaganimizning ildizi sentyabrga borib taqalmaydi.

Kuzgi o'yinlarni o'tgan yildan beri izlab yurgandik. Oktyabr oyi uchun bizda Argentina va Urugvay ishtirokidagi Xitoydagi o'tkaziladigan musobaqa varianti bor edi. Bu turnir haqida Ravshan Sayfiddinovich Ermatovning o'zi Xitoy associaciyasi rahbariyati bilan shu yilning bahorida Malayziyadagi OFK Kongressida bo'lganimizda gaplashgandi. Biroq, malum ichki sabablarga ko'ra, Xitoy bu o'yinlarni bekor qildi (oxir-oqibat, o'zi ham oktyabr oyida o'ynamaydigan bo'ldi), o'yinlar homiysi bo'lgan Xitoy kompaniyasi esa biz bilan ushbu uchrashuvlar bo'yicha muzokaralarni davom ettirdi, lekin endi o'yinlar Xitoyda emas, Malayziyada o'tkaziladigan bo'ldi.

Malum bir bosqichda Argentina o'yinlarda ishtirok etishdan bosh tortdi, biz esa 9-oktyabr kuni Malayziyada Urugvay bilan o'yinni tasdiqladik. Shundan kelib chiqib, oktyabr oyining ikkinchi sanasi - 13 yoki 14-oktyabr uchun variantlarni izladik. Ammo, avgust oyida Urugvay bizga 9-kuni o'ynay olmasligini malum qildi va o'yinni 13-oktyabrga ko'chirishni yoki o'yinni bekor qilishni so'radi.

Oktyabr oyining ikkinchi sanasiga bo'lgan kelishuvlarimizni bekor qildik. Oxirgi pallada 9-oktyabrga variantlar qidira boshladik. Yuqori moliyaviy so'rovlar tufayli Boliviya bilan kelishuvga erisha olmadik. Yakunda ular Iordaniya bilan o'ynaydigan bo'lishdi, Marokash esa bizga qari faqat o'z maydonida o'ynashga tayyor edi. Rossiya bilan bo'lgan variantni Xitoydagi musobaqa ehtimoli paydo bo'lgani tufayli oldinroq bekor qilib yuborgandik. Ushbu uchta terma jamoa oktyabr oyida rasman MTJ bilan o'rtoqlik o'yinida ishtirok eta olishini tasdiqlagan edi.

Buyog'iga bunday tushunmovchiliklar bo'lmasligi kerak. Noyabr oyida ko'plab yaxshi darajadagi Afrika terma jamoalari bilan o'ynash imkoniyati bo'ladi. Kelasi yil mart oyida esa Portugaliya terma jamoasi bilan o'ynashimiz mumkin. Ravshan Irmatovning shaxsan o'zi sobiq FIFA hakami va hozirgi kunda Portugaliya futbol federaciyasi prezidenti Pedro Proensa bilan gaplashgandi. Shuningdek, Toshkentda FIFA Series musobaqasiga mezbonlik qilish imkoniyatimiz bor. FIFAning yangi musobaqasini o'tkazish uchun arizani yil boshida topshirgan edik. FIFAdan esa yaqindagina javob keldi, Janni Infantino Toshkentga kelgan vaqti.

1-iyunda esa JCH-2026 mezbon terma jamoalarining biri bilan o'ynaymiz. Kelishuv imzolanib ham bo'lgan. Muhimi, mundialda ushbu terma jamoa bilan bir guruhdan joy olmasak bo'lgani," - deya yozmoqda Sherzod Igamberdiev ijtimoiy tarmoqdagi sahifalaridan birida.