OCHL. Murabbiylar o'yindan oldin nima deyishdi?

Tehrondagi "Ozodi" stadionida "Persepolis" Qatarning "Al Sadd" klubini qabul qiladi. Malumki, birinchi o'yinda eronliklar safarda 1:0 hisobida zafar quchishgandi. Bugungi o'yindan so'ng finalga chiqqan omadli jamoa nomi malum bo'ladi. Javob uchrashuvidan oldin tashkil etilgan matbuot anjumanida har ikki jamoa ustozlari o'z fikrlarini bildirishdi.

Jezualdu Ferreyra ("Al Sadd" bosh murabbiyi):
- "Birinchi o'yinda biz yaxshi o'ynagandik, biroq raqib g'alaba qozondi. Biz javob uchrashuviga ham faqat g'alabani ko'zlab kelganmiz. SHogirdlarim "Persepolis"ni mag'lub etadigan kuchga ega. Bu o'yin ikkala jamoa uchun ham qiyin bo'ladi. Kurash so'nggi soniyalarga qadar kechadi. O'ylaymanki, hakam bizga qarshi noto'g'ri qarorlar chiqarmaydi. O'yin boshlanishi bilan hujumga o'tib tezkor gol kiritishga harakat qilamiz. Biz Eronga faqat g'alaba uchun kelganmiz".

Branko Ivankovich ("Persepolis" bosh murabbiyi):
- "Avvalo shuni aytishim kerak, yarim finalga chiqishning o'ziyoq katta natija. Bu natijani ketma-ket ikkinchi yil uddaladik. "Al Sadd" bilan bitta guruhda o'ynagandik va bu jamoani juda yaxshi bilamiz. Biz muxlislar uchun o'ynaymiz, uydagi o'yinlarda eng katta ustunligimiz ham ishqibozlarimiz ko'pligida. "Al Sadd" kuchli jamoa. Raqib tarkibida Xavi, Gabi, Bagdad Bunedja singari futbolchilar bor, lekin bizning tarkib ham o'ziga yarasha kuchli. Men mana shu to'qnashuvga o'z muxlislarimizni stadionga chorlab qolaman".