OCHL. "D" guruhidagi vaziyat va imkoniyatlar haqida

"D" guruhida ishtirok etayotgan Qarshining "Nasaf" klubi kecha BAAda "Al Ahli" mehmoni bo'lib, bu o'yinda hisob ochilmadi. Natijada 3-turda biznikilardan ochko olgan faqat "Nasaf" bo'ldi. Guruhdagi narigi bellashuv esa Saudiya Arabistonida o'tkazildi va bunda "Al Ahli" "Traktorsozi"ni 2:0 hisobida mag'lub etdi.

Kechagi bahsda "Nasaf" yaxshi harakat qildi. Qarshiliklar ayniqsa, himoyada mustahkam turishdi va shu tufayli raqibga gol urish imkoni berishmadi. Qolaversa, jamoa etakchisi Artur Gevorkyanning jarohat olib maydonni tark etishi ham "Nasaf" o'yiniga birmuncha tasir ko'rsatdi. Oldinda yana uchta tur borligini inobatga olsak, guruhda ikkinchi o'rinni egallab turgan "Nasaf"da keyingi bosqichga chiqish uchun yaxshi imkoniyat yuzaga kelgan. Agar Ro'ziqul Berdiev shogirdlari Qarshida "Al Ahli"ni mag'lub etishsa, imkoniyat yanada oshadi.

Mazkur guruhda Saudiyaning "Al Ahli" klubi 7 ochko bilan birinchi o'rinda boryapti. Aytib o'tganimizdek, "Nasaf" ikkinchi pog'onada va hisobida to'rt ochko bor. Keyingi o'rinlarni "Traktorsozi" (3 ochko) va "Al Ahli" (BAA, 2 ochko) egallab turishibdi. Navbatdagi tur o'yinlari 7 aprel kuni o'tkaziladi.

SO'Z
- Qarshida hujumkor o'yin namoyish etamiz. Bugun o'z o'yinimizni to'liq ko'rsata olmadik. Ammo javob bahsida ancha shiddatli harakat qilamiz. (Ro'ziqul Berdievning "Al Ahli"ga qarshi javob uchrashuvidan oldin aytgan fikrlari)
 
3-tur. 18 mart
"Al Ahli" - "Nasaf" 0:0
"Al Ahli" - "Traktorsozi" 2:0

JADVAL

#	Jamoa	O'	YU	D	M	UG - O'G	T-N	Ochk
1	Al Ahli	3	2	1	0	7 - 4	3	7
2	Nasaf Qarshi	3	1	1	1	3 - 3	0	4
3	Tractor Sazi Tabriz	3	1	0	2	2 - 4	-2	3
4	Al-Ahli	3	0	2	1	3 - 4	-1	2

Keyingi uchrashuvlar
4-tur. 7 aprel
"Nasaf" - "Al Ahli" (BAA)
"Traktorsozi" - "Al Ahli" (S.Arabistoni)