Norvegiya 99,9% JCHda! Estoniyaga qarshi kechgan qiyin o'yin taqdiri 6 daqiqada hal qilindi!

Jahon chempionatiga 28 yilda ilk bor chiqish uchun Norvegiya o'z uyida estoniyaliklarni mag'lub etishi va Italiyaga o'ta yirik hisobda mag'lub bo'lmasligi talab qilinardi – aniq hisob esa har ikki termaning bittadan uchrashuvidan so'ng malum bo'lardi. 

Birinchi vazifani skandinavlar muvaffaqiyatli bajara olishdi, lekin oson bo'ldi deyish qiyin.

Norvegiya to'p nazoratini ilk daqiqalardan o'z qo'liga Oldi — 80%, qatorasiga ikkita burchak zarbasi, dastlabki 8 daqiqada esa 4 ta zarba yo'lladi. Shunga qaramay, estoniyaliklar ancha vaqtgacha qarshilik ko'rsatishdi. Vaqti-vaqti bilan ular o'yinni o'z darvozalaridan biroz uzoqlashtirishni ham uddalashdi. 

Shu o'rinda, muxlislarning yodida bo'lsa ajab emas norvegiyaliklar aynan Estoniya darvozasiga guruhdagi raqiblar orasida eng kam gol urishga muvaffaq bo'lgandi: Italiyaga — 3 ta gol, Isroilga — 4 va 5 ta, Moldaviyaga — 5 va 11 (!). Estoniya bilan birinchi bahsda esa minimal g'alaba rasmiylashtirilgandi (1:0).

Xoland va Syorlot maydonda bo'lsa ham norvegiyaliklarga hujumlarni aniq yakunlovchi zarba etishmasdi. G'alatiroq tuyulishi mumkin, ko'rmaganlar ishonmasligi ham mumkindek, ammo 30-daqiqada aniq zarbalar bo'yicha Estoniya oldinda edi — 1:0. Umumiy zarbalar soni esa 2:11...

Birinchi bo'limda muxlislar gol ko'rishmadi. O'yindan kelib chiqsak, durang bo'lim uchun adolatli yakun edi: skandinavlar maydondagi katta ustunlikka qaramay, birorta yuz foizlik vaziyat yarata olishmadi va 0,85 xG qayd etishdi.

Tanaffusdan qaytgach, Norvegiya darhol ishga jiddiy kirishdi va omad ham ular tomonga o'girildi. Estoniyaliklar bor kuchlari bilan raqibga qarshilik qilishardi, ammo Bergening o'ng qanotdan amalga oshirgan uzatmasidan keyin Syorlotni zararsizlantira olishmadi. Birinchi gol xursandchiligi tugab ulgurmay, "Atletiko" hujumchisi esa dublga erishdi. Bu safar assist "Borussiya Dortmund" vakili Yulian Ryuerson hisobiga yozildi. Natijada, 52-daqiqadayoq bu bahsda sensaciya bo'lmaligi aniq bo'lib ulgurdi.

Shunday bo'lsada, skandinavlar to'xtashni istamasdi! Elkadagi bosim yuki yo'qolib, shunchaki futboldan zavq olish imkoni paydo bo'ldi. Ryuerson yana to'pni havodan jarima maydonchasiga yo'lladi, oxirgi zarbani bu safar Erling Xoland amalga oshirdi. 6 daqiqa ichida 3 ta gol!

Uchinchi gol ortidan to'rtinchisi ham o'zini uzoq kuttirmadi. David Mellr uzoq burchakni nishonga olib to'pni uzatdi, Xoland esa aynan shuni kutib turgandi. Erling — joriy mavsum 30 ta gol urgan birinchi futbolchiga aylandi. Buning uchun unga bor yo'g'i 19 ta uchrashuv etarli bo'ldi! Haqiqiy kiborg!

O'yindagi so'nggi gol esa norvegiyaliklar darvozasiga urildi. Himoyachilar Robi Saarma osonlik bilan qochib ketib, Nyulandning harakatlariga qarama-qarshi yo'nalishda zarba berishga imkon yaratib berishdi. Dastlabki 50 daqiqada jamoalar birorta gol ura olmagan bo'lsa, keyingi 15 daqiqada — "srazu" 5 ta. Qolgan daqiqalarda jamoalar final hushtagini kutib harakat qilishdi. Faqat bir vaziyatda rikoshetdan so'ng to'p Nyuland darvozasi to'siniga tegdi.

Oxirgi turdan va Italiyaga safardan avval Norvegiya raqibdan 3 ochko oldinda va to'plar farqi "+29". Italiyaliklarda esa "+12". Jennaro Gattuzo jamoasi guruhda birinchi bo'lishi uchun Norvegiyani 9:0 hisobida mag'lubiyatga uchratishi kerak. Eslatib o'tamiz, ushbu jamoalarning, Norvegiyadagi, birinchi to'qnashuvi 3:0 hisobida Xoland va sheriklari foydasiga hal bo'lgandi. Endi ana o'sha raqibni 9 ta to'p farqi bilan taslim etish — ertakka o'xshaydi.